Koeman vlerëson epokën e Flick: Barcelona është pretendenti kryesor për kurorën e La Ligës

Ish-trajneri i Barcelonës, Ronald Koeman, ka ndarë mendimin e tij për ecurinë aktuale të katalanasve nën drejtimin e Hansi Flick, duke u shprehur i bindur se ekipi ndodhet në rrugën e duhur për të dominuar kampionatin spanjoll. Pavarësisht humbjeve të fundit, holandezi beson se Barcelona mbetet forca kryesore në La Liga, ndërsa vlerësoi natyrën e paparashikueshme të Ligës së Kampionëve. Gjatë pjesëmarrjes së tij në turneun bamirës të golfit “Derbi del Golf” në Barcelonë, Koeman u kërkoi tifozëve të mos bien në panik pas rezultateve negative kundër PSG-së dhe Real Madridit. Sipas tij, humbjet janë pjesë e lojës, ndërsa cilësoi Barcelonën si një skuadër me potencial të lartë dhe me një strateg të shkëlqyer në stol. Duke analizuar filozofinë e Hansi Flick, Koeman vuri në dukje stilin e guximshëm të lojës. “Barcelona luan një futboll spektakolar, por që mbart rreziqe, sidomos kur mbrojtja qëndron lart dhe presioni ndaj topit mungon. Megjithatë, kjo qasje ofron shumë për futbollin dhe skuadra është duke e përvetësuar me sukses,” u shpreh ai. Në lidhje me Frenkie de Jong, Koeman e vlerësoi atë si një lojtar polivalent të pazëvendësueshëm, duke theksuar se aftësia e tij për të mbuluar pozicione të ndryshme, përfshirë atë të qendërmbrojtësit, është një vlerë e shtuar. Megjithatë, ai pranoi se dëmtimet e shpeshta në dy vitet e fundit e kanë bërë të vështirë për holandezin që të sigurojë një vend stabël në formacion. Duke iu referuar menaxhimit të talenteve të reja, si Lamine Yamal, Koeman mbështeti vendimet e trajnerit të Spanjës, Luis de la Fuente. Ai nënvizoi se kalendari i ngjeshur kërkon një balancë të kujdesshme për të shmangur lodhjen fizike të lojtarëve që janë të angazhuar maksimalisht si në klube ashtu edhe në kombëtare. Në fund, ish-tekniku holandez foli edhe për të ardhmen e tij dhe rivalitetin në Spanjë. Ai vlerësoi forcën e Real Madridit dhe rolin e Mourinhos në media, ndërsa sqaroi se për momentin nuk ka ndërmend t’i rikthehet detyrës së trajnerit. “Tani jam i përqendruar tërësisht te familja dhe jetesa mes Barcelonës dhe Holandës,” përfundoi Koeman.