Detaje tronditëse të vrasjes makabre në Baicë: Prokuroria ngre aktakuzë ndaj të dyshuarit T.K.

Prokuroria Themelore në Prishtinë ka zyrtarizuar ngritjen e aktakuzës ndaj shtetasit T.K., i cili dyshohet për kryerjen e veprave penale “Vrasje e rëndë” dhe “Mbajtja në pronësi, kontroll ose posedim të paautorizuar të armëve”. Ngjarja e rëndë ka ndodhur më 3 gusht 2025 në fshatin Baicë të Lipjanit. Sipas dosjes së prokurorisë, motivi i këtij krimi dyshohet të ketë qenë një mosmarrëveshje e çastit, e cila kulmoi me privimin mizor nga jeta të viktimës, E.B. Në përshkrimin e detajuar të aktakuzës thuhet se i pandehuri fillimisht e ka goditur viktimën me një send të fortë në pjesë të ndryshme të trupit. Më pas, ai dyshohet se ka përdorur një litar për ta shtrënguar viktimën në qafë, duke i shkaktuar asfiksi mekanike, e cila rezultoi fatale për jetën e të ndjerit. Pas kryerjes së aktit kriminal, dyshohet se i pandehuri është përpjekur të zhdukë gjurmët duke e tërhequr zvarrë trupin e viktimës dhe duke e fshehur atë brenda një grope, të cilën e ka mbuluar me dhe. Po ashtu, janë fshehur edhe mjetet që dyshohet se janë shfrytëzuar për ekzekutimin e vrasjes. Gjatë aksionit të bastisjes në banesën e të dyshuarit në Baicë, autoritetet kanë gjetur dhe konfiskuar një arsenal të konsiderueshëm armësh pa leje, duke përfshirë pushkë, armë automatike dhe sasi të ndryshme municioni. Në përfundim të hetimeve, prokurori i çështjes i ka propozuar gjykatës që, pas shqyrtimit të provave materiale dhe dëshmive, i pandehuri T.K. të shpallet fajtor dhe të dënohet me masën maksimale të paraparë nga legjislacioni në fuqi.