Aktakuzë për vrasjen makabre në Baicë: Top Kolshi përballet me drejtësinë për ekzekutimin e Enver Bajraktarit

Prokuroria Themelore në Prishtinë ka zyrtarizuar sot ngritjen e aktakuzës ndaj të pandehurit Top Kolshi. Ai akuzohet për kryerjen e veprave penale “Vrasje e rëndë” dhe “Mbajtja në pronësi, kontroll ose posedim të paautorizuar të armëve”. Sipas dosjes së prokurorisë, ngjarja e rëndë ka ndodhur më 3 gusht 2025, në fshatin Baicë të Lipjanit. Në intervalin kohor ndërmjet orës 16:00 dhe 18:54, pas një konflikti verbal, i pandehuri dyshohet se e ka privuar nga jeta në mënyrë mizore viktimën Enver Bajraktari. Sipas hetimeve, T.K. e ka goditur viktimën me një mjet të fortë, ndërsa më pas e ka mbytur atë duke ia lidhur litarin rreth qafës. Pas kryerjes së këtij krimi gjakftohtë, i pandehuri dyshohet se është përpjekur të zhdukë gjurmët duke e groposur trupin e të ndjerit dhe duke fshehur mjetet e përdorura gjatë ekzekutimit të veprës penale. Gjatë bastisjes së kryer në vendbanimin e të pandehurit në Baicë, autoritetet kanë gjetur dhe konfiskuar një arsenal armësh, përfshirë armë automatike dhe pushkë të llojeve të ndryshme, bashkë me municion përkatës, të cilat mbaheshin në kundërshtim me ligjin. Prokurori i çështjes i ka propozuar gjykatës kompetente që, pas administrimit të të gjitha provave materiale dhe dëshmive gjatë shqyrtimit gjyqësor, i pandehuri të shpallet fajtor dhe të dënohet sipas dispozitave ligjore në fuqi.