Emergjencë në mbrojtjen e Malit të Zi: Xhonatan Dreshaj thirret për duelin ndaj Qipros

Përzgjedhësi i përfaqësueses së Malit të Zi ka vendosur të ndërhyjë në formacion për sfidën e radhës kundër Qipros, duke thirrur në grumbullim mbrojtësin e djathtë të Deçiqit, Xhonatan Dreshaj. Ky i fundit ishte pjesë e ekipit edhe në grumbullimin e mëparshëm, ndonëse ende nuk ka pasur mundësinë të regjistrojë debutimin e tij zyrtar me fanellën e kombëtares. Lëvizja vjen si pasojë e krizës së dëmtimeve që ka goditur repartin e prapavijës. Në ndeshjen e fundit, stafi teknik u detyrua të improvizonte me Andrija Bullatoviqin në krahun e djathtë. Mesfushori i Lensit u shfaq mjaft i disiplinuar në këtë rol, duke shfrytëzuar përvojën e tij të mëparshme në kategoritë e moshave, ku kishte luajtur në pozicione të ngjashme. Situata në kampin malazez u përkeqësua pas dëmtimit të Milan Roganoviqit gjatë nxehjes përpara përballjes me Letoninë, ndërsa vetëm një ditë para sfidës së mbrëmshme, edhe Adam Marushiq u detyrua të largohej nga grumbullimi për shkak të një shqetësimi fizik. Kujtojmë se Mali i Zi do të mbyllë rrugëtimin në fazën e grupeve të Ligës së Kombeve këtë të diel, ku do të përballet si mysafir ndaj Qipros, me fillim nga ora 15:00.