Invazioni i bagëtive në Kriva Pallankë: Kërkohet shpallja e gjendjes së krizës për shkak të dëmeve masive

Një situatë alarmante është krijuar në qytetin e Kriva Pallankës në Maqedoninë e Veriut, ku mbi një mijë krerë lopë enden të pashqetësuara nëpër hapësirat publike dhe zonat e banuara. Prania e tyre e vazhdueshme ka shkaktuar shqetësim të thellë tek banorët, të cilët përballen përditë me dëme të mëdha materiale në pronat e tyre private dhe në tokat bujqësore. Në përpjekje për të vënë situatën nën kontroll, kryetari i kësaj komune, Sashko Mitovski, i është drejtuar qeverisë me një kërkesë zyrtare për shpalljen e gjendjes së krizës për një afat kohor prej 30 ditësh. Sipas tij, ky hap është i domosdoshëm për të krijuar bazën ligjore dhe operacionale që do të mundësonte ndërhyrjen e autoriteteve për zgjidhjen përfundimtare të këtij fenomeni. Autoritetet lokale bëjnë me dije se problemi është përshkallëzuar ndjeshëm vitet e fundit. Nëse pesë vite më parë numri i bagëtive që lëviznin të lira llogaritej në rreth 400 krerë, sot ky shifër ka arritur në mbi një mijë, duke bërë që situata të dalë jashtë kontrollit të pronarëve dhe mbikëqyrjes komunale. Kryetari Mitovski shprehet optimist se shpallja e gjendjes së krizës do të jetë mekanizmi kyç që do t'u lejojë institucioneve qendrore dhe atyre vendore të bashkëpunojnë ngushtë, duke ndalur shkatërrimin e mëtejshëm të pronave dhe duke rikthyer qetësinë për qytetarët e këtij rajoni në verilindje të vendit.