Fundjavë me ndryshime të theksuara: Temperaturat bien ndjeshëm, ja çfarë parashikon IHMK

Instituti Hidrometeorologjik i Kosovës (IHMK) ka njoftuar se gjatë fundjavës, përkatësisht më 14 dhe 15 nëntor, vendi do të përfshihet nga një përkeqësim i motit, i karakterizuar nga vranësira të dendura dhe reshje shiu. Ditën e shtunë, moti do të jetë kryesisht i vranët dhe i shoqëruar me reshje shiu, ndërsa në zonat malore parashikohen edhe të reshura bore. Termometri do të shënojë rënie, ku vlerat minimale do të lëvizin ndërmjet 1 dhe 4 gradë Celsius, kurse ato maksimale do të jenë ndërmjet 4 dhe 7 gradë Celsius. Ndërkaq, e diela do të sjellë një stabilizim të pjesshëm të motit, me vranësira të shpërndara dhe intervale me diell. Gjatë kësaj dite, temperaturat do të shënojnë rritje, duke arritur vlerat minimale nga 0 deri në 2 gradë Celsius, ndërsa ato maksimale do të variojnë nga 9 deri në 13 gradë Celsius. Sa i përket ndikimit në shëndet, IHMK paralajmëron se kushtet biometeorologjike gjatë fundjavës do të jenë kryesisht të pafavorshme, për shkak të lagështisë dhe temperaturave të ulëta. Kjo situatë mund të shkaktojë shqetësime te personat me sëmundje kronike, ata që vuajnë nga reumatizma apo problemet kardiovaskulare. Megjithatë, pritet një përmirësim i lehtë i këtyre kushteve të dielën, pas rritjes së temperaturave. Instituti këshillon qytetarët të vishen në mënyrë të përshtatshme për motin e freskët dhe të tregojnë kujdes të shtuar gjatë qëndrimit në ambiente të hapura. Në aspektin agrometeorologjik, reshjet vlerësohen si pozitive për lagështinë e tokës dhe furnizimin e kulturave bujqësore me ujë. Megjithatë, për shkak të temperaturave të ulëta, sidomos në zonat malore, kërkohet kujdes ndaj bimëve të ndjeshme. Për këtë arsye, rekomandohet shmangia e punimeve në tokat e lagështa dhe monitorimi i vazhdueshëm i gjendjes së kulturave bujqësore.