Detaje tronditëse nga vrasja e 38-vjeçares në Austri: Autori besonte se bashkëshortja ishte shtrigë

Një krim makabër që tronditi opinionin publik në Austri po merr përmasa të reja, ndërsa hetimet për vrasjen e një nëne të katër fëmijëve kanë çuar në arrestimin e një personi të dytë. Një 45-vjeçar nga Kosova është vënë në pranga nën dyshimet për bashkëpunim në vrasje dhe trafikim të paligjshëm të armëve. Ngjarja e rëndë ndodhi më 5 prill në Sooß, ku një 47-vjeçar, gjithashtu me shtetësi nga Kosova, dyshohet se i dha fund jetës së bashkëshortes së tij 38-vjeçare. Sipas dosjes së prokurorisë, autori fillimisht kishte tentuar të krijonte një atmosferë normale duke i dërguar gruas dhurata për Pashkë, përpara se të kryente krimin brutal, ku dyshohet se qëlloi tri herë me armë zjarri dhe e goditi viktimën rreth 40 herë me kaçavidë. Pas aktit, trupi i pajetë u gjet i fshehur në kopshtin e shtëpisë. Në muajin nëntor, para Gjykatës Rajonale të Wiener Neustadtit do të dalë 45-vjeçari i akuzuar për furnizimin me armë të autorit. Prokuroria pretendon se ai ishte në dijeni të qëllimit vrasës të bashkëshortit, por avokati i tij, Mirsad Musliu, i ka hedhur poshtë këto pretendime, duke argumentuar se klienti i tij thjesht kishte tentuar ta shiste armën, pa pasur dijeni për planin e krimit. Një tjetër element që ka ngritur pikëpyetje të mëdha është gjendja mendore e autorit kryesor. Ekspertiza psikiatrike ka konfirmuar se 47-vjeçari vuan nga një psikozë e rëndë, duke e shpallur atë të paaftë për të gjykuar veprimet e tij nga pikëpamja penale. Gjatë kohës në paraburgim, ai ka shfaqur sjellje të çrregullta, duke përmendur vazhdimisht demonë dhe magji të zezë, ndërsa pretendonte se bashkëshortja e tij ishte një shtrigë. Avokati i të dyshuarit të dytë vazhdon të këmbëngulë në pafajësinë e klientit të tij, duke theksuar se ndonëse ai ka një të kaluar kriminale, nuk ka asnjë lidhje me këtë vrasje specifike. Për të dy të dyshuarit, deri në një vendim përfundimtar të gjykatës, mbetet në fuqi prezumimi i pafajësisë.