Gjilani në alarm: Katër të mitur dërgohen në paraburgim për tentativë vrasjeje

Gjykata Themelore në Gjilan ka marrë vendim për caktimin e masës së paraburgimit prej 30 ditësh ndaj katër të miturve, të cilët dyshohet se janë përfshirë në një ngjarje të rëndë kriminale të kualifikuar si “Vrasje në tentativë”. Prokuroria Themelore e këtij qyteti ka siguruar aprovimin e kërkesës së saj, duke i lënë nënn mbikëqyrje të rreptë ligjore të dyshuarit E. R.(1), E. R.(2), E. S. dhe E. Sh. Sipas dokumentit zyrtar të prokurorisë, ngjarja ka ndodhur më 11 nëntor 2026, rreth orës 10:25, në rrugën “Mësuesit e viteve të 90-ta” në qytetin e Gjilanit. Të dyshuarit, duke vepruar në bashkëveprim mes tyre, kanë tentuar me dashje t'i privojnë nga jeta dy viktimat, L. U. dhe A. Sh. Prapaskena e këtij sulmi dyshohet të ketë qenë një mosmarrëveshje e mëparshme mes të miturit E. R.(1) dhe të dëmtuarit L. U., e cila më pas ka eskaluar në dhunë fizike ndaj të dy viktimave. Gjatë përleshjes, i mituri E. Sh. ka përdorur një mjet të mprehtë – thikë – e cila konsiderohet e përshtatshme për shkaktimin e lëndimeve të rënda trupore. Me këtë mjet, ai e ka goditur viktimën A. Sh. një herë në anën e djathtë të kraharorit, ndërsa të dëmtuarin L. U. e ka sulmuar dy herë në pjesën e shpinës, pranë boshtit kurrizor. Si pasojë e plagëve të marra, dy viktimat janë detyruar të kërkojnë menjëherë ndihmë mjekësore në Emergjencën e Spitalit të Përgjithshëm në Gjilan. Për shkak të gjendjes tejet të rënduar shëndetësore, i dëmtuari L. U. është transferuar urgjentisht për trajtim të mëtejmë në Qendrën Klinike Universitare të Kosovës (QKUK) në Prishtinë, ndërkohë që të miturit E. S. dhe E. Sh. janë larguar me shpejtësi nga vendi i ngjarjes për t'i shpëtuar drejtësisë. Këto veprime të kundërligjshme ngrenë dyshimet e bazuara se të miturit kanë kryer veprën penale të vrasjes në tentativë, e cila është e dënueshme sipas dispozitave të Kodit Penal të Republikës së Kosovës (KPRK). Gjyqtari i procedurës paraprake në Departamentin për të Mitur ka arsyetuar se ekzistojnë të gjitha kushtet dhe bazat ligjore për caktimin e paraburgimit. Vlerësimi i gjykatës ka qenë se çdo masë tjetër alternative do të rezultonte e pamjaftueshme për të garantuar zhvillimin e suksesshëm dhe të papenguar të procedurës penale. Në fund, palët e pakënaqura gëzojnë të drejtën ligjore që t'ushtrojnë ankesë kundër këtij vendimi pranë Gjykatës së Apelit të Kosovës.