Mashtrim me përbërjen e mishit: AUV bllokon 178 kilogramë suxhuk të kompanisë 'BUQUKU'

Agjencia e Ushqimit dhe Veterinarisë (AUV) ka ndërmarrë masa urgjente ndaj kompanisë për përpunimin e mishit “BUQUKU SH.P.K.” me seli në Pejë, pasi analizat laboratorike kanë nxjerrë në pah mospërputhje serioze mes përbërjes reale të produktit dhe asaj të deklaruar në etiketat e produkteve. Sipas informacioneve zyrtare, problemi ka dalë në dritë pas testimit të produktit “Suxhuk shtëpiak” në laboratorin e specializuar “ALIMENTI-OMNILAB” në Bullgari. Megjithëse në deklaracionin e produktit shënohet se përmban vetëm mish dhe yndyrë lope, analizat kanë konfirmuar praninë e ADN-së së pulës. Për fat të mirë, rezultatet kanë përjashtuar praninë e ADN-së së derrit. Nga ana e saj, AUV ka sqaruar se gjetjet laboratorike konfirmojnë prezencën e ADN-së së shpendëve, por pa precizuar sasinë apo mënyrën e përdorimit. Për këtë arsye, autoritetet po vijojnë hetimet për të zbuluar nëse bëhet fjalë për mish pule të ndarë mekanikisht apo përbërës të tjerë, të cilët nuk janë bërë të ditur për konsumatorët. Pas konfirmimit të shkeljes, inspektorët e AUV-së kanë zbarkuar në ambientet e kompanisë, ku kanë bllokuar 178 kilogramë suxhuk, prej të cilëve 120 kilogramë të llojit “Kalorik” dhe 58 kilogramë “Suxhuk shtëpiak”. Njëkohësisht, është urdhëruar ndalimi i menjëhershëm i prodhimit dhe tërheqja e këtyre produkteve nga të gjitha pikat e shitjes. Agjencia ka bërë me dije se do të zgjerojë rrezen e kontrolleve për të verifikuar të gjithë zinxhirin e prodhimit, gjurmueshmërinë e lëndëve të para dhe përputhshmërinë e etiketave me përmbajtjen faktike të produkteve të tjera të këtij operatori. Ndërkohë, është bërë e qartë se rezultatet aktuale përqendrohen vetëm te “Suxhuk shtëpiak” dhe nuk mund të gjeneralizohen për të gjithë gamën e produkteve të kompanisë. Në fund, AUV ka rikujtuar se përgjegjësia ligjore për deklarimin e saktë të përbërësve dhe sigurinë ushqimore u takon operatorëve ekonomikë. Institucioni ka paralajmëruar se do të ndërmarrë të gjitha hapat administrativë dhe ligjorë në përputhje me legjislacionin në fuqi, duke u zotuar se do ta mbajë publikun të informuar për çdo zhvillim të ri.