Tentoi t'i fuste në Kosovë pa deklaruar: Dogana sekuestron 150 mijë euro në Vërmicë

Një rast i rëndë i shmangies së deklarimit të parave të gatshme është parandaluar nga njësitet e Antikontrabandës në Pikëkalimin Kufitar të Vërmicës. Gjatë një kontrolli rutinë, zyrtarët doganorë kanë gjetur një sasi të konsiderueshme prej 150,000 eurosh, të cilat nuk ishin raportuar nga drejtuesi i një automjeti. Incidenti ndodhi rreth orës 19:00, kur automjeti në fjalë po hynte në territorin e Republikës së Kosovës. Ndonëse shoferi kishte pohuar fillimisht para autoriteteve se nuk posedonte asgjë për të deklaruar, kontrolli i imtësishëm i mjetit nxori në pah të kundërtën. Fillimisht, drejtuesi pretendoi se në makinë ndodheshin 120,000 euro, por numërimi i saktë nga zyrtarët konfirmoi shifrën prej 150,000 eurosh, të gjitha në kartëmonedha prej 50 eurosh. Në përputhje me legjislacionin në fuqi, autoritetet doganore kanë ndërmarrë masat e menjëhershme. Një shumë prej 37,500 eurosh, e barabartë me 25% të vlerës, është konfiskuar për shkak të mosdeklarimit, ndërsa pjesa tjetër prej 112,500 eurosh është deponuar për ruajtje deri në përfundimin e plotë të hetimeve. Lidhur me këtë rast është vënë në lëvizje Sektori i Hetimeve të Doganës, të cilët në koordinim me Prokurorinë e Prizrenit kanë kryer procedurat e nevojshme. Pas konsultimeve me prokurorin kujdestar, drejtuesi i automjetit është lënë i lirë, por me kushtin që të sjellë dokumentacionin e nevojshëm që dëshmon prejardhjen ligjore të këtyre mjeteve monetare. Dogana e Kosovës ka shfrytëzuar rastin për t’u bërë thirrje të gjithë qytetarëve dhe udhëtarëve që t'i përmbahen detyrimit ligjor për deklarimin e çdo shume prej 10,000 eurosh ose më shumë gjatë kalimit të kufirit. Institucioni rikonfirmoi vendosmërinë e tij për të luftuar qarkullimin e paligjshëm të parave dhe për të ruajtur integritetin e kontrolleve kufitare.