Debat i ashpër në Kuvend: Arben Vitia dhe Albena Reshitaj përplasen për furnizimin me barna dhe takimet e kaluara

Ministri i Shëndetësisë, Arben Vitia, është përfshirë në një debat të ashpër verbal me deputeten e Lidhjes Demokratike të Kosovës (LDK), Albena Reshitaj, gjatë seancës plenare në Kuvendin e Kosovës. Përplasja erdhi pasi parlamentarja e opozitës ngriti shqetësimet e saj lidhur me mungesën e barnave në institucionet shëndetësore. Gjatë fjalës së tij për të kundërshtuar kritikat, ministri Vitia kujtoi një bashkëbisedim të mëparshëm mes tyre, duke u shprehur se në takimet e kaluara deputetja kishte thurur lëvdata për menaxhimin e sektorit të shëndetësisë. “Lumë na që të kemi, më keni lavdëruar. Në shumë takime ku kemi folur gjatë, ju vetëm lëvdata keni pasur për sistemin shëndetësor. I keni pasur edhe disa kërkesa personale, për të cilat ju kam thënë se nuk mund t’i realizoj”, u shpreh ndër të tjera kreu i Shëndetësisë. Vitia theksoj gjithashtu se sukseset dhe investimet në këtë fushë nuk mund të vlerësohen përmes fotografive, por përmes angazhimit konkret dhe projekteve që kanë marrë jetë, duke insistuar se Reshitaj ka marrë pjesë personalisht në takimet ku performanca e dikasterit që ai drejton është vlerësuar pozitivisht. Këto pretendime kanë sjellë reagimin e menjëhershëm të deputetes Reshitaj, e cila ka hedhur poshtë çdo pretendim se ajo ka vizituar zyrën e ministrit në rrethanat e përmendura. Ajo deklaroi se ministri ka ngatërruar identitetin e personit në fjalë. Për të provuar vërtetësinë e fjalëve të tij dhe për t'i dhënë fund kundërshtimeve, ministri Vitia nxori telefonin celular gjatë seancës dhe i shfaqi deputetes një fotografi si dëshmi të takimit të tyre.