Beteja për kreun e grupit ndaj Bjellorusisë, UEFA i beson drejtimin e sfidës një ekipi nga Kroacia

Kombëtarja shqiptare e futbollit po përgatitet për sfidën e radhës, e cila do të luhet të dielën në një terren neutral në Hungari, ku do të matë forcat me Bjellorusinë. Organi qeverisës i futbollit evropian, UEFA, ka caktuar zyrtarët që do të vendosin drejtësi në këtë takim vendimtar për pozitat në krye të Grupit 1 të Ligës C në Ligën e Kombeve. Përballja i është besuar një trupe gjykuese nga Kroacia. Kryesor i kësaj sfide do të jetë Igor Pajač, i cili do të ndihmohet në dy krahët nga anësorët Bojan Zobenica dhe Ivan Mihalj. Ndërkohë, roli i gjyqtarit të katërt i është besuar Patrik Pavlešić, kurse dhoma e sistemit VAR do të menaxhohet nga dyshja Mario Zebec dhe Fran Jović, gjithashtu me shtetësi kroate. Arbitri kryesor 41-vjeçar, Igor Pajač, mbart mbi supe një përvojë të rëndësishme në arenën ndërkombëtare të futbollit. Gjatë këtij sezoni futbollistik, gjyqtari i lindur në Zagreb ka drejtuar takime të rëndësishme në skenën evropiane, duke përfshirë edhe fazën e grupeve të UEFA Champions League, si në rastin e duelit mes Lens dhe Sporting Lisbonë. Për sa i përket anës sportive, kuqezinjve u mjafton vetëm një barazim në tokën e Budapestit për të siguruar dhe ruajtur kreun e tabelës, duke qenë se aktualisht avantazhohen me dy pikë epërsi ndaj përfaqësueses bjelloruse.