Formë e shkëlqyer në Zagreb: Flaka Loxha siguron çerekfinalen në Grand Prix

Xhudistja kosovare Flaka Loxha ka shkëlqyer në turneun prestigjioz Grand Prix Zagreb 2026, duke arritur deri në fazën çerekfinale pas një paraqitjeje fantastike në tatami. Në përballjen e parë të ditës, Loxha triumfoi në mënyrë spektakolare me Ippon ndaj garueses nga Bosnja dhe Hercegovina, Andjela Samardzis, duke nisur kështu rrugëtimin e saj me ritme të larta. Suksesi i saj mori përmasa edhe më të mëdha në xhiron e dytë, ku xhudistja jonë mposhti me Yuko medalisten e bronztë të kampionatit botëror, kroaten Ana Viktorija Puljiz, duke treguar karakter dhe përgatitje të shkëlqyer fizike. Tanimë, për përballjen e radhës në kuadër të çerekfinaleve, Flaka Loxha do të matë forcat me xhudisten nga Spanja, Adriana Rodriguez Salvador, në kërkim të vazhdimësisë drejt medaljeve.