Demonstrim force në Paqësor: Pekini mobilizon mbi 100 anije pranë Tajvanit dhe rrit alarmin rajonal

Pekini ka ndërmarrë një nga operacionet detare më madhështore të viteve të fundit, duke angazhuar njëkohësisht më shumë se 100 anije luftarake dhe të rojës bregdetare në një stërvitje ushtarake në shkallë të gjerë përgjatë Paqësorit Perëndimor dhe rreth ishullit të Tajvanit. Sipas autoriteteve të sigurisë në Tajvan, manovrat u zhvilluan gjatë ditëve të para të nëntorit pa një paralajmërim zyrtar nga Kina. Këto operacione përfshinë skenarë të simuluar sulmi ndaj objektivave urbane dhe forcave ushtarake, përfshirë vetë territorin e Tajvanit. Në këtë dislokim morën pjesë forca detare nga komandat veriore, jugore dhe lindore të ushtrisë kineze, çka dëshmon një shkallë të lartë të sinkronizimit dhe bashkërendimit mes njësive të ndryshme ushtarake në rajon. Një zyrtar i lartë i sigurisë tajvaneze i ka cilësuar këto lëvizje si një formë të presionit të heshtur ushtarak, që synon intimidimin pa shkaktuar domosdoshmërisht një përplasje të hapur diplomatike. Sipas të njëjtit burim, përmasat e këtij angazhimi ushtarak rezultuan edhe më të mëdha se ato të stërvitjes së fundit të bërë publike nga Kina ndaj Tajvanit, e cila njihet me emrin “Justice Mission 2025”. Gjatë së njëjtës periudhë, një nëndetëse kineze kreu gjithashtu lëshimin e një rakete balistike ndërkontinentale nga Deti i Verdhë në drejtim të brendësisë së territorit të Kinës, bënë të ditur autoritetet e sigurisë në Tajvan. Ministria e Mbrojtjes në Tajvan theksoi se këto operacione përfshijnë praktika për bllokimin e hyrjes së forcave të huaja në zona të caktuara, një taktikë kjo që mund të shfrytëzohet për të penguar ndonjë ndërhyrje të mundshme nga Shtetet e Bashkuara ose aleatët e tyre në rast të një konflikti të armatosur. Megjithëse deri të premten prania e anijeve kineze ra në afërsisht 70 njësi, aktiviteti i përgjithshëm detar dhe ai ajror në zonë ka mbetur në nivele tejet të larta. Nga ana e tyre, autoritetet në Pekin nuk kanë dhënë kommente direkte lidhur me stërvitjet e raportuara nga pala tajvaneze. Më herët, qeveria kineze është shprehur se operacionet e aeroplanmbajtëses Liaoning në Paqësor përbëjnë vetëm stërvitje rutinë dhe nuk synojnë asnjë shtet specifik. Këto zhvillime gjeopolitike vijnë në prag të samitit të APEC-ut në Shenzhen, ku parashikohet të zhvillojnë një takim dy udhëheqësit e fuqive të mëdha, Presidenti amerikan Donald Trump dhe homologu i tij kinez, Xi Jinping. Niveli i tensioneve rreth Tajvanit ka një peshë kritike për ekonominë globale. Ky rajon përfaqëson një prej artereve kryesore të lundrimit detar ndërkombëtar, ndërsa vetë Tajvani mbart një funksion jetik në prodhimin e gjysmëpërçuesve të avancuar që gjejnë zbatim në pajisjet elektronike, automjete dhe fushën e inteligjencës artificiale. Çdo përshkallëzim i mëtejshëm i situatës do të sillte rreziqe madhore për zinxhirët ndërkombëtarë të furnizimit, tregtinë detare dhe sektorin e teknologjisë, sidomos në një kohë kur raportet ekonomike mes Uashingtonit dhe Pekinit mbeten tejet të ngarkuara.