Përplasja e fortë në distancë: Isa Mustafa i kthen përgjigje të prerë Vjosa Osmanit

Ish-kryeministri i Kosovës, Isa Mustafa, i është kundërpërgjigjur ashpër ish-presidentes Vjosa Osmani, e cila gjatë një paraqitjeje televizive e kishte vënë në shënjestër atë dhe figura të tjera politike në vend. Mustafa ka zgjedhur të mos e zgjasë shumë debatin me të, duke u shprehur shkurtimisht se është dëm të merret me të dhe se ajo është katandisur keq. Në intervistën e dhënë mbrëmjen e kaluar, Osmani kishte kritikuar ekzekutivin aktual, duke thënë se Qeveria Kurti nuk duhet të shndërrohet në një kopje të keqe të qeverive të kaluara të udhëhequra nga Isa Mustafa dhe Hashim Thaçi. Ajo gjithashtu përmendi periudhën e saj si presidente, duke theksuar se i është dashur të merret me pasojat e dëmeve të lëna nga paraardhësit, ndërsa bëri një përjashtim vetëm për kreun e LDK-së, Lumir Abdixhiku, të cilin e quajti mik të saj. Debati ka marrë përmasa edhe më të gjera kur Osmani ka drejtuar akuza të rënda në drejtim të ish-kryeministrit Avdullah Hoti, duke pretenduar se ai erdhi në krye të Qeverisë së Kosovës përmes votave të kontrabanduara dhe vullnetit të tjetërsuar të qytetarëve. Ajo po ashtu ka kritikuar deputeten Hykmete Bajrami për qëndrimet e saj ndaj Listës Serbe, si dhe ka sulmuar gjashtë deputetë të LDK-së që kishin dalë kundër marrëveshjes me Lëvizjen Vetëvendosje për çështjen e presidentit, duke i akuzuar se i shërbejnë të ashtuquajturit SHIK dhe se i kanë kërkuar falje për rikthimin e saj në parti, kërkesë të cilën ajo tha se e kishte refuzuar. Këto deklarata kanë shkaktuar reagimin e menjëhershëm të ish-kryeministrit dhe deputetit aktual, Avdullah Hoti. Përmes një reagimi publik, Hoti ka hedhur poshtë akuzat, duke e cilësuar turizmin politik si një aktivitet joetik dhe duke paralajmëruar se koha po i sqaron të gjitha, ndërsa ka shtuar se me përfundimin e këtij sezoni politik, personat në fjalë mbeten të frustruar dhe të nervozuar në rrugë.