Ultimatumi i demokratëve ndaj Trumpit: Kërcënojnë me bllokim fondesh për të ndalur konfliktin me Iranin

Katër ligjvënës të lartë amerikanë nga radhët e Partisë Demokratike kanë paralajmëruar se do të kundërshtojnë çdo marrëveshje buxhetore të fundvitit, nëse ajo nuk vendos kufizime të qarta ndaj administratës së presidentit Donald Trump për të vijuar fushatën ushtarake kundër Iranit. Përmes një deklarate të përbashkët, senatorët Michael Bennet, Bernie Sanders, Chris Van Hollen dhe Tammy Duckworth theksuan se elektorati amerikan ka dhënë një mesazh të qartë për t'i dhënë fund asaj që ata e cilësuan si një luftë të paligjshme dhe shkatërrimtare të drejtuar nga kreu i Shtëpisë së Bardhë. Teksa afati i 11 dhjetorit për sigurimin e financimit qeveritar po afron me ritme të shpejta, senatorët bënë thirrje që Kongresi të refuzojë çdo pakt afatshkurtër që injekton miliarda dollarë shtesë për konfliktin e zgjedhur nga presidenti. Duke sjellë në vëmendje historikun e konflikteve të mëparshme në Vietnam, Irak dhe Afganistan, ata alarmuan se tensionet e tilla ushtarake rrezikojnë të zvarriten për dekada të tëra, duke rënduar ekonominë, dobësuar kapacitetet ushtarake dhe cenuar drejtpërdrejt sigurinë kombëtare të qytetarëve amerikanë. “Kur të votojmë për ndarjen e fondeve, synojmë të financojmë qeverinë dhe të ndalojmë financimin e kësaj lufte”, thuhet shprehimisht në deklaratën e tyre zyrtare. Ky hap vjen në vazhdën e një nisme të mëparshme të senatorit Bennet, i cili u pat kërkuar kolegëve të tij ligjvënës që të pengojnë çdo paketë fiskale që parashikon buxhet shtesë për këtë konflikt. Në krahun tjetër, presidenti Donald Trump ka reaguar ashpër përmes rrjetit të tij social Truth Social, duke i bërë thirrje udhëheqjes së Senatit që të veprojë urgjentisht për miratimin e një projektligji prej 350 miliardë dollarësh dedikuar mbrojtjes, përmes mekanizmit të pajtimit buxhetor. Trump mbrojti sukseset e tij në krye të shtetit, duke pohuar se e ka rimëkëmbur ushtrinë gjatë mandatit të parë dhe se po e përsërit këtë arritje për ta bërë atë edhe më të fuqishme se më parë. Kreu i Shtëpisë së Bardhë akuzoi gjithashtu opozitën, duke thënë se shumica radikale demokrate në Kongresin e ardhshëm e ka synim kryesor bllokimin e këtyre investimeve, me qëllim që t'i lërë trupat amerikane të pambrojtura. “Republikanët duhet të bëjnë atë që u takon për luftëtarët tanë. Demokratët nuk do ta bëjnë kurrë këtë. Koha është tani”, përfundoi reagimi i tij.