Goditje e rëndë për hendbollin: KHF Kastrioti përjashtohet zyrtarisht nga Superliga

Klubi i hendbollit të femrave KHF Kastrioti nga Ferizaj, dikur shtatë herë kampion i Kosovës, po kalon një ndër periudhat më kritike në historinë e tij, pasi është përjashtuar zyrtarisht nga garat e Superligës. Ky vendim e vendos një skuadër me traditë dhe me një të kaluar të lavdishme para një sfide të madhe për mbijetesë sportive. Bazuar në nenet 14.6 dhe 14.6.1 të Propozicioneve të garave, Komisari i Garave ka marrë vendimin zyrtar për të ndëshkuar klubin ferizajas me një gjobë prej 1,000 eurosh. Gjithashtu, është marrë masa e largimit të menjëhershëm nga kampionati, ndërsa të gjitha ndeshjet e mbetura sipas kalendarit zyrtar janë anuluar dhe fshirë nga tabela e renditjes. Autoritetet kompetente kanë bërë të ditur se një ankesë e mundshme nuk e pezullon zbatimin e këtij dënimi. Në arsyetimin e lëshuar nga Federata e Hendbollit e Kosovës theksohet se pas shqyrtimit të raporteve të ndeshjeve dhe deklaratës së zyrtarëve të klubit, është konstatuar se KHF Kastrioti, për arsye subjektive, nuk ka mundur t'i zhvillojë takimet e parapara në kalendar. Meqenëse skuadra nuk ka arritur të luajë më shumë se 50%+1 të ndeshjeve të edicionit 2026-27, ajo do të detyrohet të garojë në një rang më të ulët nga sezoni 2027-28. Në fund të njoftimit zyrtar, Federata ka bërë të ditur edhe këshillën juridike, duke saktësuar se palët e pakënaqura kanë të drejtë të ushtrojnë ankesë brenda afateve të përcaktuara me rregullatore, duke filluar nga dita e publikimit të Buletinit numër 14.