Përplasje në distancë: Xheneta Fetahu i kundërpërgjigjet ashpër Zojës pas ironisë në BBVK

Atmosfera mes ish-banorëve dhe konkurrentëve aktualë të formatit “Big Brother VIP Kosova” është tensionuar sërish, pas një deklarate të bërë nga Zoja Nushi gjatë darkës me pyetje nga publiku. Kur u vu përballë pyetjes nëse po tenton të imitojë lojën e ndonjë ish-finalisteje, Zoja e hodhi poshtë këtë pretendim, duke theksuar se ajo nuk e kalon kohën duke u marrë me punët e shtëpisë, siç ishte rasti me lavanderinë. Kjo deklaratë u perceptua menjëherë si një shigjetim direkt ndaj Xheneta Fetahut, e cila gjatë qëndrimit të saj në shtëpi ishte kritikuar shpesh për kohën e gjatë që shpenzonte në atë ambient. Reagimi i Xhenetës nuk vonoi të vinte. Nëpërmjet një postimi në rrjetet sociale, ajo zgjodhi të ironizojë Zojën, duke u shprehur: “Më mirë në lavanderi, se sa në Galaxy”. Përmes kësaj fjalie, ish-finalistja bëri një aludim të qartë që duket se lidhet me Vali Corleonen. Në të njëjtin postim, Xheneta ia kujtoi Zojës edhe periudhën kur kjo e fundit ushtronte detyrën e opinionistes në televizionin T7, kohë gjatë së cilës e kishte analizuar vazhdimisht strategjinë e saj të lojës. “Paske harruar që e ke komentuar çdo ditë në T7 si opinioniste”, shtoi ajo me sarkazëm. Për ta mbyllur reagimin e saj, Xheneta nuk kurseu as ironinë për rrugëtimin e Zojës në këtë reality show, duke i thënë: “Vazhdo luaj se finalen e ke të garantuar”. Kjo përplasje virtuale ka rikthyer vëmendjen e publikut te dinamikat dhe tensionet e vazhdueshme që përcjellin protagonistët e këtij edicioni.