Spanja nën ethet e protestave: Miliona qytetarë në rrugë kundër krizës së strehimit

Spanja është përfshirë nga një valë e fuqishme protestash dhe një grevë e përgjithshme 24-orëshe, e cila ka paralizuar vendin si kurrë më parë në 14 vitet e fundit. Shkaku kryesor i këtij revolte masive është rritja e papërballueshme e çmimeve të banesave dhe qirave, një krizë që ka prekur thellë mirëqenien e qytetarëve spanjollë. Greva ka sjellë ndërprerje të ndjeshme në arsim, transport dhe në degë të ndryshme të ekonomisë. Lëvizja e cila nisi nga shoqatat e qiramarrësve dhe gjeti mbështetjen e sindikatave të punëtorëve, kërkon ndërhyrje urgjente shtetërore për të frenuar koston e lartë të jetesës. Sipas të dhënave nga Konfederata e Shoqatave të Qiramarrësve, deri në orët e mesditës, rreth 4 milionë njerëz i ishin bashkuar grevës. Sektorët industrialë si ai automobilistik dhe portual raportuan pjesëmarrje deri në 90%, ndërsa shërbimet e pastrimit shënuan një pjesëmarrje prej 82%. Rajonet bregdetare, me theks të veçantë Katalonja dhe Andaluzia, ishin pikat ku pakënaqësia u shfaq më fuqishëm, për shkak të kostove të larta të strehimit që kanë bërë të pamundur jetesën për shumë familje. Në Barcelonë, situata u tensionua tej mase, me bllokime rrugësh, djegie gomash dhe ndërprerje të plotë të transportit publik, përfshirë autostradën AP-7. Ndërsa organizatorët numëruan rreth 400 mijë protestues, policia lokale dha një shifër prej 55 mijë personash. Gjatë natës, përplasjet u përshkallëzuan, duke çuar në vandalizimin e disa bizneseve dhe përleshje me forcat e rendit. Edhe në Madrid, pavarësisht motit të keq, rreth 120 mijë persona vërshuan në bulevardet kryesore, duke bllokuar përkohësisht aksesin pranë tregut qendror me shumicë. Autoritetet konfirmuan arrestimin e më shumë se 50 personave në nivel kombëtar për shkak të incidenteve të ndodhura. Sandra Mora, përfaqësuese e Sindikatës së Qiramarrësve në Madrid, deklaroi për RNE se kjo grevë shërben si një kujtesë për fuqinë e punëtorëve, të cilët janë gjithashtu qiramarrës apo debitorë hipotekorë që po mbyten nga kriza. Këtë dramë sociale e pasqyron më së miri Almudena López, 74 vjeçe, e cila protestoi për të ardhmen e fëmijëve të saj. Ajo tregoi se i biri 43-vjeçar, ndonëse profesionist në sektorin e teknologjisë së informacionit, e ka të pamundur të blejë një shtëpi dhe është i detyruar të ndajë një apartament me qira.