Kosova vazhdon përgatitjet për Izraelin, stërvitjen e sotme e zhvilloi në “Fadil Vokrri”

Kombëtarja e Kosovës ka vazhduar stërvitjet para ndeshjes së së shtunës ndaj Izraelit në kuadër të Ligës së Kombeve. Edhe në ditën e katërt të përgatitjeve Foda i pati në disponim të gjithë futbollistët e grumbulluar. 15 minutat e para aq sa u lejuan për media, fokusi kryesor ishte në aspektin fizik. Vlen të theksohet se ritmi në këta minuta ishte i lartë. Atmosfera në kamp është e jashtëzakonshme me futbollistët që do të synojnë ta mbajnë këtë ritëm deri të shtunën, kur do të përballet me Izraelin. Takimi me izraelitët është mjaft i rëndësishëm dhe tre pikët janë obligim për “Dardanët”. Pas katër ndeshjve të para, Kosova është e dyta me pesë pikë aq sa ka edhe Irlanda e treta, kurse Izraeli është i fundit me dy pikë të grumbulluara. Synimi i “Dardanëve” mbetet pozita e dytë në grup pasi do të siguronte vazon e dytë për shortin e kualifikimeve të rregullta për Kampionatin Evropian 2028. Kombëtarja e Kosovës nesër e zhvillon stërvitjen e fundit para takimit me Izraelin që luhet të shtunën nga ora 15:00.