Operacion i SPAK në Fier, shoqërohet në polici drejtori i Spitalit Rajonal Arben Voja

Drejtori i Spitalit Rajonal të Fierit, Arben Voja, është shoqëruar mesditën e kësaj të enjteje nga agjentët e Byrosë Kombëtare të Hetimit (BKH) dhe dy prokurorë të Prokurorisë së Posaçme (SPAK). Ai ndodhet aktualisht në ambientet e Drejtorisë Vendore të Policisë Fier, ku po merret në pyetje në kuadër të një hetimi paraprak. Referuar burimeve pranë bluve të Fierit, Voja po pyetet nga hetuesit, ndërkohë që deri në këto momente nuk është konfirmuar zyrtarisht nëse ekziston një masë sigurie apo vendim gjykate për ndalimin e tij të mëtejshëm. Përveç funksionit aktual që mban në krye të spitalit, të njëjtat burime bëjnë me dije se fokusi i hetimeve shtrihet edhe në periudhën e kaluar, kur Arben Voja ka drejtuar Zyrën Vendore të Regjistrimit të Pasurive të Paluajtshme (Kadastrën) në këtë qark. Institucionet hetimore ende nuk kanë dhënë një njoftim zyrtar për akuzat specifike apo motivet e këtij operacioni. Pritet që në vijim autoritetet kompetente të lëshojnë një komunikatë zyrtare për të sqaruar detajet e dosjes dhe arsyet e ndërhyrjes së SPAK.