Zgjedhjet/ SPAK dorëzon pretencën për kryebashkiakun e Vaut të Dejës, kërkohet heqja e lirisë dhe ndalesa e funksioneve publike

Prokuroria e Posaçme Kundër Korrupsionit dhe Krimit të Organizuar (SPAK) ka paraqitur zyrtarisht konkluzionet përfundimtare për kreun e Bashkisë së Vaut të Dejës, Kristjan Shkreli, i cili u Kollaj nën hetim për veprën penale të korrupsionit aktiv gjatë procesit zgjedhor. Në përfundim të fazës shqyrtuese të kësaj çështjeje, organi i akuzës ka kërkuar nga Gjykata deklarimin fajtor të Shkrelit dhe dënimin e tij me një vit heqje lirie. Përveç kërkesës për burgim, organi i akuzës ka kërkuar gjithashtu aplikimin e masës plotësuese, e cila konsiston në ndalimin e ushtrimit të çdo funksioni publik për një periudhë pesëvjeçare ndaj kryebashkiakut. Sipas dosjes hetimore të ngritur nga SPAK, ngjarja daton në periudhën e fushatës për zgjedhjet parlamentare të 11 majit 2025. Shkreli dyshohet se ka premtuar dhe shpërndarë favore e përfitime materiale për banorët e fshatit Stajkë, me qëllim sigurimin e votave në favor të Partisë Socialdemokrate, e cila drejtohet nga Tom Doshi. Hetimet kanë zbuluar se kreu i bashkisë ka shfrytëzuar gjendjen e nevojës së komunitetit vendas lidhur me mungesën e infrastrukturës së energjisë elektrike. Ai akuzohet se ka përdorur ndërhyrjet për përmirësimin e rrjetit elektrik pikërisht gjatë kohës së fushatës zgjedhore si mjet presioni dhe joshjeje për të orientuar vullnetin e votuesve. Tashmë, fati gjyqesor i çështjes mbetet në dorën e Gjykatës së Posaçme, e cila pritet të shprehet me vendimin përfundimtar për këtë proces.