Seanca e Kuvendit ndërpritet përkohësisht, pasdite votohet Ligji për Specialen dhe çështje të tjera kyçe

Kuvendi i Kosovës ka hyrë në pauzë deri në orën 14:00, pas përmbylljes së fjalimeve jashtë rendit të ditës dhe pyetjeve të drejtuara nga deputetët. Pas kësaj ndërprerjeje, legjislativi do t'i rikthehet punimeve përmes votimit të marrëveshjeve ndërkombëtare dhe mbajtjes së interpelancës për ministrin e Shëndetësisë, Arben Vitia. Agjenda e seancës parashikon gjithashtu shqyrtimin e një mocioni përmbajtësor që trajton sfidat dhe situatën në sektorin e energjisë. Në pikën e fundit të kësaj seance është planifikuar shqyrtimi dhe miratimi në lexim të tretë i Projektligjit për Dhomat e Specializuara dhe Zyrën e Prokurorit të Specializuar. Kjo pikë u vendos në rend dite me kërkesën e ushtrueses së detyrës së kryetares së PDK-së, Vlora Çitaku, e cila ka bërë të ditur se brenda dy javësh do të ndërmarrë një nismë të re ligjore për ndryshimin dhe plotësimin e këtij ligji.