Tregu i punës në Zvicër: Papunësia shënon rritje në tremujorin e tretë të vitit 2026

Zvicra po përballet me një trend në rritje të papunësisë gjatë tremujorit të tretë të vitit 2026. Bazuar në anketën e forcës punëtore (SAKE), të publikuar të enjten nga Zyra Federale e Statistikave (BFS), shkalla e papunësisë, e llogaritur sipas standardeve të Organizatës Ndërkombëtare të Punës (ILO), ka prekur kuotën e 5,6 për qind. Ky tregues shënon një përkeqësim krahasuar me tremujorin e dytë të vitit, kur shkalla ishte 4,9 për qind, si dhe tejkalon shifrën e vitit të kaluar, e cila qëndronte në 5,1 për qind. Përkundër kësaj rritjeje të papunësisë, numri i personave të punësuar ka shënuar një ecuri pozitive. Në tremujorin e tretë, në Zvicër ishin të angazhuar 5,387 milionë punonjës, shifër kjo 0,5 për qind më e lartë se në të njëjtën periudhë të një viti më parë. Megjithatë, nëse përllogaritet me orar të plotë, kjo rritje është më modeste, duke arritur vetëm 0,1 për qind. Është e rëndësishme të bëhet dallimi mes metodologjisë së ILO-s dhe asaj të Sekretariatit Shtetëror për Ekonomi (SECO). Shifrat e ILO-s janë zakonisht më të larta, pasi përfshijnë edhe individët që janë në kërkim të punës, por nuk janë të regjistruar pranë zyrave regjionale të punësimit (RAV), për dallim nga SECO që numëron vetëm të regjistruarit. Përkufizimi i ILO-s përfshin këdo që është pa punë, por që është aktiv në kërkimin e një pozicioni të ri dhe i gatshëm për të filluar menjëherë. Aktualisht, shkalla e papunësisë sipas SECO-s ka mbetur në nivelin e 3 për qind. Në një vështrim krahasues me hapësirën evropiane, Zvicra vijon të ketë një pozitë më të favorshme, duke pasur parasysh se në Bashkimin Evropian shkalla e papunësisë sipas ILO-s për të njëjtën periudhë ishte 6,2 për qind. Statistikat e BFS-së nxjerrin në pah gjithashtu se papunësia prek më shumë punëtorët e huaj. Në tremujorin e katërt të vitit 2025, shkalla e papunësisë te të huajt ishte 8,2 për qind, përballë 3,6 për qind te shtetasit zviceranë. Më të ekspozuarit janë shtetasit nga vendet jashtë BE-së dhe EFTA-s, ku përfshihen edhe qytetarët nga Kosova, te të cilët shkalla e papunësisë arriti në 11,8 për qind. Për mijëra bashkatdhetarë tanë që operojnë në sektorë si ndërtimtaria, gastronomia, logjistika dhe shërbimet, ky ngadalësim i tregut të punës mund të reflektohet në mënyrë më të ndjeshme se sa te pjesa tjetër e popullsisë.