Bllokimi nga qeveria për ndërmarrjen e pastrimit, Përparim Rama: Do të gjejmë zgjidhje për Prishtinën

Kryeqyteti ka ndërmarrë hapa për themelimin e një ndërmarrjeje të re komunale të pastrimit, mirëpo ky vendim është ndeshur me kundërshtimin e nivelit qendror. Kryetari i Prishtinës, Përparim Rama, ka bërë të ditur se Ministria e Administrimit të Pushtetit Lokal (MAPL) ka lëshuar një vlerësim negativ lidhur me këtë nismë, duke krijuar pengesa për një nga sfidat kryesore të menaxhimit të mbeturinave në qytet. Gjatë reagimit të tij, i pari i Prishtinës ka shprehur pakënaqësi të thellë ndaj këtij qëndrimi, duke vënë në pah faktin se komuna të tjera, si Obiliqi dhe Fushë Kosova, kanë krijuar tashmë mekanizma të ngjashëm pa u përballur me pengesa të tilla, ndërkohë që një e drejtë e tillë po i mohet padrejtësisht Kryeqytetit. “E krijuam kompaninë e re komunale të pastrimit, ashtu siç kanë vepruar edhe Obiliqi e Fushë Kosova. Por Prishtinën e bllokuan. MAPL-ja e ka kthyer vlerësimin negativ!”, deklaroi Rama.