Tentuan t'i kalonin ilegalisht drejt Greqisë, arrestohet 19-vjeçari në Vlorë, shpallet në kërkim bashkëpunëtori

Strukturat e Policisë në Vlorë kanë vënë në pranga një 19-vjeçar, ndërsa kanë shpallur në kërkim një 21-vjeçar, pasi dyshohet se bashkëpunonin për transportimin e paligjshëm të katër shtetasve kinezë kundrejt shpërblimit financiar, me synim kalimin e tyre drejt shtetit grek. Sipas njoftimit zyrtar, i arrestuari është shtetasi M. M., 19 vjeç, me banim në Konispol, kurse personi i shpallur në kërkim është A. S., 21 vjeç, banues në Kosovë. Nga hetimet paraprake rezulton se roli i 19-vjeçarit ishte vëzhgimi i terrenit dhe sinjalizimi për praninë e mundshme të efektivëve të policisë. Ndërkohë, shtetasi A. S. drejtonte automjetin me të cilin po transportonte katër emigrantët kinezë në drejtim të Konispolit. Gjatë ndërhyrjes së forcave të rendit, 21-vjeçari ka braktisur mjetin dhe është arratisur në këmbë, duke shfrytëzuar errësirën dhe terrenin e favorshëm të zonës. Aktualisht, autoritetet vijojnë aksionin intensiv për kapjen e të riut që ndodhet në arrati dhe për zbardhjen e plotë të këtij rrjeti të paligjshëm. Në cilësinë e provës materiale, policia ka sekuestruar dy automjete që përdoreshin për këtë veprimtari kriminale. Dokumentacioni i plotë procedural i është përcjellë Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme ligjore.