Zbardhen detajet e frikshme: Ekzekutimi i shqiptarit dhe vrasja e policit në Bruksel, vepër e të njëjtit grup kriminal

Hetimet mbi vrasjen e një shtetasi shqiptar në lagjen Ixelles të Brukselit dhe ekzekutimin e oficerit të policisë belge, Nordine El Talbi, kanë çuar autoritetet drejt një përfundimi tronditës: të dyja ngjarjet janë kryer nga i njëjti grup kriminal. Sipas informacioneve të siguruara nga mediat vendase, hetuesit kanë konstatuar se atentatet, të ndodhura në harkun kohor të pak orëve, janë të lidhura pazgjidhshmërisht me njëra-tjetrën. Ngjarja e parë u regjistrua më 12 tetor, rreth orës 17:50, pranë Parlamentit Europian. Në hyrje të një pallati në rrugën Wiertz, viktima shqiptare u qëllua për vdekje me shtatë deri në tetë plumba. Dëshmitarët okularë përshkruan largimin me shpejtësi të tre ose katër personave nga vendi i krimit. Ndonëse viktima nuk kishte precedentë penalë në Belgjikë, dinamika e ekzekutimit të çon drejt pistës së një vrasjeje me pagesë, të lidhur me trafikun e paligjshëm të narkotikëve. Vetëm pak orë më vonë, në mbrëmjen e së njëjtës ditë, 41-vjeçari Nordine El Talbi humbi jetën në zonën e Jette. Polici u qëllua ndërsa po kontrollonte një automjet të vjedhur, i cili ishte raportuar si i tillë gjatë një grabitjeje në Tubize. Ndonëse fillimisht Prokuroria e Brukselit përjashtoi çdo lidhje mes dy rasteve, analizimi i hollësishëm i pamjeve të kamerave të sigurisë dhe provave të tjera teknike ka bindur organet e rendit për autorësinë e përbashkët. Pas kryerjes së krimeve, autorët u larguan me shpejtësi nga territori belg. Brenda një jave, operacioni i gjerë policor çoi në arrestimin e tre të dyshuarve në Almeria të Spanjës, të cilët mendohet se po synonin të arrinin në Marok, ndërsa një tjetër u prangos në një stacion treni në Paris. Të katër personat, mes të cilëve edhe një i mitur, janë ekstraduar tashmë drejt Belgjikes për t'u përballur me drejtësinë. Në kuadër të hetimeve, në Bruksel u arrestuan edhe dy persona të tjerë menjëherë pas ngjarjeve. Njëri prej tyre u lirua nga gjykata për mungesë provash, ndërsa i dyti vazhdon të qëndrojë nën masën e sigurisë në paraburgim.