Teleferiku i Vodnos rikthehet së shpejti: Gjorgjievski premton udhëtim të sigurt pas rikonstruksionit të thellë

Kryetari i Qytetit të Shkupit, Orce Gjorgjievski, ka bërë të ditur se teleferiku i Vodnos pritet t’u rikthehet qytetarëve brenda muajit të ardhshëm. Pas një periudhe ndërprerjeje, ky aset i rëndësishëm turistik është duke iu nënshtruar një procesi të plotë modernizimi. “Teleferiku është një nga përvojat më të dashura për banorët e Shkupit, duke na ofruar një lidhje të veçantë me natyrën dhe panoramën e kryeqytetit. Fatkeqësisht, gjatë inspektimeve konstatuam mangësi serioze, të shkaktuara nga mungesa e mirëmbajtjes dhe neglizhenca e udhëheqësive të kaluara për gati një dekadë. Për mua, siguria e vizitorëve është prioriteti absolut dhe për këtë nuk mund të ketë kompromis”, deklaroi Gjorgjievski gjatë vizitës së tij në terren. Aktualisht, punimet janë përqendruar në rikonstruksionin e plotë të kabinave dhe infrastrukturës përcjellëse. Gjithashtu, është në pritje të mbërritjes edhe motori i teleferikut, i cili ka kaluar një proces riparimi të specializuar jashtë vendit, për të garantuar standarde maksimale të funksionimit. Duke e vënë theksin te domosdoshmëria e këtyre ndërhyrjeve, Gjorgjievski u shpreh optimist se pas përfundimit të të gjitha kontrolleve teknike dhe të sigurisë, teleferiku do të jetë sërish funksional. “Jemi duke rikthyer në gjendje optimale një shërbim që ishte lënë pas dore për vite me radhë, me qëllimin e vetëm që shkupjanët dhe mysafirët tanë të shijojnë një udhëtim të sigurt dhe të besueshëm”, përfundoi ai.