RMV: Kriptovalutat bëhen pjesë e Kodit Penal, hapet rruga për konfiskimin e aseteve virtuale

Komisioni parlamentar në Maqedoninë e Veriut ka përfunduar me sukses shqyrtimin në lexim të dytë të ndryshimeve në Kodin Penal. Tashmë, propozim-ligji i është përcjellë deputetëve për votim në seancë plenare. Ndryshimet thelbësore sjellin përfshirjen e kriptovalutave në kuadër të konfiskimit të pasurisë së fituar në mënyrë të paligjshme, një sektor ky që deri më tani ka operuar pa një kornizë të qartë ligjore në vend. Në nenin 122, paragrafi 38 të Kodit Penal, përkufizimi i pronës është zgjeruar ndjeshëm. Tashmë, ai përfshin paratë, mjetet e tjera të pagesës, letrat me vlerë, depozitat dhe burimet ekonomike në çfarëdo forme – të luajtshme, të paluajtshme, të prekshme apo të paprekshme – ku bëjnë pjesë zyrtarisht edhe asetet virtuale. Megjithatë, ekspertët e krimeve financiare dhe hetimeve online shprehen skeptikë lidhur me mekanizmat e identifikimit të pronarëve të këtyre aseteve. Sipas tyre, për të zbatuar këto ndryshime, shteti duhet të ndjekë modelet rajonale, duke nisur nga krijimi i një institucioni mbikëqyrës, siç është Banka Popullore. Gjithashtu, subjektet që merren me konvertimin e kriptovalutave në para kesh do të obligohen të raportojnë identitetin e poseduesve, ndërsa përmes Ligjit për deklarimin e pasurisë, qytetarët do të jenë të detyruar t'i bëjnë publike këto zotërime. Mosdeklarimi i pasurive në kriptovaluta do të pasojë me ndjekje penale. Në këtë proces, një rol kyç do të kenë Policia Financiare dhe Drejtoria e Inteligjencës Financiare. Këto ndryshime ligjore po ndërmerren në përputhje me kërkesat e Ministrisë së Drejtësisë drejtuar Komisionit Evropian për vlerësimin e draftit të ri të Kodit Penal, një hap i kërkuar edhe në raportin e fundit të progresit për Maqedoninë e Veriut.