Front i përbashkët kundër krimit: Drejtori i Policisë së Shtetit, Skënder Hita, forcon aleancën strategjike me homologun italian në Romë

Në kryeqytetin italian, Roma, është zhvilluar një takim i nivelit të lartë mes Drejtorit të Përgjithshëm të Policisë së Shtetit, Drejtues Madhor Skënder Hita, dhe homologut të tij italian, Prefektit Vittorio Pisani. Fokus i bisedimeve ka qenë intensifikimi i bashkëpunimit operacional dhe ndërveprimi më i ngushtë në luftën kundër grupeve kriminale përmes skuadrave të përbashkëta hetimore. Gjatë takimit, i cili u zhvillua në një atmosferë tejet konstruktive, dy titullarët konfirmuan marrëdhëniet e shkëlqyera mes dy institucioneve. Ata shprehën vullnetin e palëkundur për ta çuar partneritetin strategjik në një stad më të lartë, duke vënë theksin te rezultatet pozitive të arritura deri më tani në betejën kundër krimit të organizuar dhe krimeve kibernetike, të cilat konsiderohen si një standard europian suksesi. Drejtori Hita falënderoi Policinë Italiane për mbështetjen e vazhdueshme ndër vite, duke theksuar se thellimi i këtij bashkëpunimi është një ndër prioritetet e tij kryesore. “Jam i vendosur të punojmë me efikasitet maksimal për t’iu përgjigjur formave të reja të kriminalitetit dhe për të qëndruar gjithnjë një hap përpara organizatave kriminale,” u shpreh Hita gjatë fjalës së tij. Nga ana tjetër, Prefekti Pisani vlerësoi lart qasjen e kreut të Policisë së Shtetit, duke garantuar mbështetjen e plotë të autoriteteve italiane. Ai nënvizoi se bashkëpunimi mes dy policive është një model që duhet shërbyer si shembull, duke kërkuar një intensifikim të mëtejshëm në luftën kundër trafiqeve të paligjshme, krimeve në hapësirën digjitale dhe vijimin e operacioneve ajrore për monitorimin dhe parandalimin e kultivimit të bimëve narkotike. Palët ranë dakord për të shtuar shkëmbimin e informacionit të inteligjencës policore dhe koordinimin e hetimeve të përbashkëta. Gjithashtu, u diskutua mbi domosdoshmërinë e rritjes së kapaciteteve profesionale për të përballuar sfidat bashkëkohore, siç janë radikalizmi dhe ekstremizmi i dhunshëm. Ky partneritet mbetet një mekanizëm jetik për identifikimin dhe lokalizimin e personave të shpallur në kërkim, si dhe për goditjen e strukturave kriminale që operojnë përtej kufijve shtetërorë, duke garantuar një siguri më të lartë dhe një reagim të unifikuar ndaj kërcënimeve që cenojnë rendin publik.