Manchester United drejt marrëveshjes me Pochettinon, pritet vendimi për stolin

Manchester United është në prag të një ndryshimi të rëndësishëm në shtabin teknik, teksa Mauricio Pochettino po pozicionohet si kandidati kryesor për të marrë drejtimin e “Djajve të Kuq”. Ndërkohë, fati i trajnerit aktual, Michael Carrick, pritet të zyrtarizohet gjatë ditës së mërkurë. Sipas burimeve të afërta me zhvillimet, drejtuesit e klubit nga Mançesteri kanë siguruar tashmë një akord verbal me strategun argjentinas, i cili aktualisht mban pozitën e selektorit të Kombëtares së Shteteve të Bashkuara të Amerikës. Për të vulosur të ardhmen e Carrickut, krerët e klubit do të mblidhen këtë të mërkurë në Monako, aty ku banon edhe bashkëpronari i Manchester United, Sir Jim Ratcliffe. Pavarësisht situatës së paqartë, Carrick vijon të jetë prezent në qendrën stërvitore, duke vazhduar përgatitjet me skuadrën. Nëse vendimi për shkarkimin e tij do të konfirmohet, njoftimi për largimin e tij pritet të bëhet publik gjatë së enjtes. Sa i përket angazhimit të Pochettinos, Manchester United duhet të aktivizojë klauzolën e lirimit nga Federata e Futbollit e SHBA-së, e cila kap vlerën e rreth nëntë milionë eurove (shtatë milionë funte). Ndonëse argjentinasi ka një kontratë të vlefshme me amerikanët deri në vitin 2030, kjo shifër nuk paraqet ndonjë pengesë financiare për gjigantin anglez. Nëse ky transferim finalizohet, Pochettino do të shënonte rikthimin e tij në Premier Ligë, vetëm dy vjet pas përfundimit të aventurës së tij në stolin e Chelseat.