Humbje për diplomacinë ruse: Ndërron jetë ambasadori Alexander Darchiev në moshën 66-vjeçare

Ministria e Punëve të Jashtme e Rusisë ka njoftuar këtë të mërkurë ndarjen nga jeta të ambasadorit të saj në Shtetet e Bashkuara, Alexander Darchiev, në moshën 66-vjeçare. Autoritetet ruse nuk kanë bërë të ditur detaje lidhur me shkaqet që çuan në vdekjen e diplomatit. Në një njoftim zyrtar, institucioni e ka cilësuar Darchiev-in si një figurë të shquar të diplomacisë, duke e vlerësuar atë si një mentor të përkushtuar, udhëheqës me përvojë dhe një njohës të jashtëzakonshëm të dinamikave politike amerikane. Sipas ministrisë, ai ishte një profesionist i nivelit të lartë që la gjurmë në shërbimin diplomatik rus. Karriera e Darchiev-it ka qenë e pasur dhe e gjatë. Ai e nisi rrugëtimin e tij diplomatik në Uashington në fund të viteve 2000, përpara se të merrte poste të rëndësishme brenda Ministrisë së Jashtme. Përvoja e tij përfshin gjithashtu një mandat gjashtëvjeçar si ambasador i Rusisë në Kanada, si dhe drejtimin e Departamentit të Amerikës së Veriut për një periudhë katërvjeçare. Sipas Boris Bondarev, ish-diplomat rus në Gjenevë që u largua nga detyra në shenjë proteste ndaj luftës në Ukrainë, Darchiev konsiderohej një bashkëpunëtor i afërt dhe i mbrojtur i Yury Ushakov, këshilltarit për politikën e jashtme të Presidentit Vladimir Putin. Në momentin e marrjes së detyrës si ambasador, analistët kishin vlerësuar se ndikimi i tij mund të ishte i kufizuar, duke pasur parasysh faktin se marrëdhëniet dhe çështjet kyçe ndërmjet Moskës dhe Uashingtonit janë trajtuar kryesisht në nivelet më të larta politike gjatë viteve të fundit.