Kusari-Lila: Parandalimi i zgjedhjeve është prioriteti kryesor, vëmendje ndaj afateve kritike në Hagë

Dalja nga ngërçi aktual politik mbetet plotësisht e arritshme, mjaft që subjektet politike të shfaqin gatishmërinë e duhur për konsensus dhe kompromis. Kështu është shprehur Mimoza Kusari-Lila, duke diskutuar mbi mundësitë e tejkalimit të situatës përmes hapave të matur institucionalë. Duke komentuar nismat për një zgjidhje të jashtëzakonshme dhe propozimet lidhur me Dhomat e Specializuara të Kosovës, ajo ka theksuar nevojën për maturi të lartë, sidomos duke pasur parasysh ngarkesën e afateve kohore që ndërlidhen me zgjedhjen e presidentit të ri dhe zhvillimet gjyqësore në Hagë. “Mendoj se kur ka vullnet, ka edhe zgjidhje. Megjithatë duhet pasur shumë kujdes që zgjidhjet të cilat lidhen me këto afate që rastësisht mund të jenë të ndërlidhura, do të thotë zgjedhja e presidentit edhe kërkesa e Partisë Demokratike, duhet të jenë të menduara mirë. Mos të harrojmë, afati për të apeluar aktgjykimin e tmerrshëm të Dhomave të Specializuara në Hagë është 30 ditë pas prezantimit apo publikimit, in fact ende se është publikuar në tërësi, por njoftimit për vendimin. Dhe 30-ditëshi përkundrejt 6 tetorit që është përcaktuar nga Gjykata Kushtetuese, 30-ditëshi për dorëzimin e apelit është 16 tetori, pas të cilit janë edhe 60 ditë të tjera për t’u targetuar në tërësi lënda e prezantuar që vjen pas 10 vjetëve,” ka deklaruar Kusari-Lila. Ajo ka paralajmëruar se veprimet e nxituara mund të krijojnë komplikime, ndaj thelbi i çdo veprimi duhet të udhëhiqet nga një qëllim i përbashkët. Sipas saj, prioritet absolut i skenës politike duhet të jetë shmangia e një procesi të ri zgjedhor. Për të arritur këtë objektiv, vendi duhet patjetër të sigurojë zgjedhjen e presidentit deri më 6 tetor. Kjo kërkon arritjen e një marrëveshjeje konsensuale mes partive për një kandidat të përbashkët, shoqëruar me kujdes të shtuar ndaj çështjeve ligjore që prekin Dhomat e Specializuara. Kusari-Lila ka kujtuar se afatet kyçe përfshijnë datën 16 tetor për dorëzimin e apelit dhe 15 dhjetorin kur lënda duhet të dorëzohet plotësisht pranë Dhomave të Specializuara të Apelit në Hagë. Përballë këtij presioni kohor, ajo ka përsëritur se interesi i përgjithshëm i Republikës kërkon bashkëpunim të ngushtë, besim reciprok dhe hapa të matur për të shmangur zgjedhjet dhe për të realizuar qëllimet e përbashkëta.