Projekti turistik prej 6 miliardë eurosh: Rama zbulon prapaskenat e investimit në Sazan dhe Zvërnec

Kryeministri Edi Rama, gjatë fjalës së tij në Samitin e Euronews 2026, ka vënë in focus potencialin e madh të Shqipërisë për të thithur një prej investimeve më të rëndësishme turistike në nivel europian. Gjatë diskutimeve mbi ekonominë dhe ruajtjen e mjedisit, kreu i qeverisë bëri të ditur se nisma që bashkon ishullin e Sazanit me gadishullin e Zvërnecit parashikohet të prekë shifrën e 6 miliardë eurove ose edhe më shumë. “Sot ne jemi në përpjekje për të sjellë investimin më të madh në Europë prej shumë vitesh në turizëm, që, i kombinuar mes ishullit të Sazanit dhe gadishullit të Zvërnecit, mund të arrijë në 6 apo më shumë miliardë. Jemi hapur si vend. Njerëzit po shikojnë ku janë mundësitë. Shqipëria ka kushtet për të punuar me investuesit e mëdhenj në mënyrë serioze dhe profesionale, por edhe sepse më kanë qejf”, u shpreh Rama. I pyetur mbi reagimet dhe protestat e ngritura rreth këtij projekti dhe ndikimin e tyre te të huajt, kreu i ekzekutivit nënvizoi se vëmendja e investitorëve bazohet tërësisht te mundësitë reale ekonomike të vendit. Ai sqaroi se kontaktet e para me Jared Kushner, dhëndrin e ish-presidentit amerikan Donald Trump, dhe një korporatë të njohur nga Katari, kanë nisur në një periudhë kur fati politik i Trump në Shtetet e Bashkuara ishte plotësisht i paqartë. “Duhet t’i them gjërat siç janë. Nuk është se e them unë, por ju në Euronews, duke më ftuar mua. Dhjetë vite më parë nuk do të ndodhte që kryeministri i Shqipërisë të ftohej në një samit turizmi për të folur për turizmin dhe nuk do të ndodhte që një kryeministër t’i kërkohej gjithmonë ‘eja, eja’, dhe jam i privilegjuar. Arsyeja reale përse kanë ardhur nuk është politike dhe nuk lidhet me Trump. Por dhëndri i Donald Trump, së bashku me një kompani shumë të madhe edhe në turizëm nga Katari, e pa shumë tërheqëse të investonte në Shqipëri. Biseda ka nisur kur Donald Trump nuk ishte e qartë nëse do shkonte në Shtëpinë e Bardhë apo në burg. S’ka aspak lidhje me këtë, por me potencialin e Shqipërisë, me ambicien tonë për të bërë diçka që është turizmi i brezit të ri”, deklaroi Rama. Sipas kryeministrit, qasja e re ndaj turizmit nuk duhet ta konsiderojë zhvillimin ekonomik si kundërshtar të natyrës, por si një mundësi për t'i ndërthurur ato në mënyrë harmonike. “Turizmi i brezit të ri nuk duhet të jetë rrjedhojë e një konflikti mes zhvillimit dhe natyrës, por, përkundrazi, rezultati i zhvillimit së bashku me natyrën. Nga ana tjetër, mënyra si zhvillohemi sot nuk duhet të mbështetet te stereotipat e konservimit, por te nevoja për rigjenerim”, tha ai. Në fjalën e tij, Rama u ndal gjithashtu te shqetësimet e ngritura për ndërhyrjet në Zvërnec dhe lagunën e Nartës, duke theksuar se zona vuan nga sfida mjedisore që kërkojnë vëmendje dhe rimëkëmbje urgjente. Ai konfirmoi se për këto iniciativa janë angazhuar ekspertë të fushave të ndryshme për të garantuar një standard të lartë mes zhvillimit dhe mbrojtjes së mjedisit. “Për të gjithë ata që thonë: ‘Ah, kjo laguna!’, askush s’e di sa e ndotur është ajo lagunë dhe sa probleme kemi me të gjitha llojet e pemëve në atë zonë, që duhen ruajtur përmes rigjenerimit. Ideja që natyra do kujdeset për veten nëse jemi ne aty dhe s’bëjmë asgjë për natyrën, është krejt e pabazë. Kjo është ajo që po përpiqemi të bëjmë me arkitektët më të mëdhenj, inxhinierët, hidrologët e gjeologët më të mirë, për të ardhur me diçka