Nga LDK te LVV: Ish-deputeti Ilir Tasholli merr pozitën e rëndësishme në Ministrinë e Shëndetësisë

Ish-deputeti i Kuvendit të Kosovës, Ilir Tasholli, ka nisur një angazhim të ri në institucionet publike, afërsisht një vit pasi iu bashkua Lëvizjes Vetëvendosje. Sipas rezultateve të konkurrimit të bëra publike të enjten nga Ministria e Digjitalizimit, Tasholli, i cili gjatë tri viteve të fundit ka kaluar nëpër tri subjekte të ndryshme politike, është emëruar në pozitën e Sekretarit të Përgjithshëm në Ministrinë e Shëndetësisë. Në listën e kandidatëve fitues, Tasholli është renditur i pari duke mbledhur 77.6 pikë, ndërsa pozita e dytë i ka takuar Lulzim Ejupit, i cili u vlerësua me 71 pikë. Sekretari i sapoemëruar i këtij dikasteri shtetëror mbart një histori të gjatë politike, e cila karakterizohet nga lëvizje të shpeshta mes partive. Ai e ka nisur rrugëtimin e tij si pjesë e Lidhjes Demokratike të Kosovës (LDK), subjekt me të cilin ushtroi mandatin e deputetit në Kuvendin e Kosovës gjatë periudhës 2019–2021. Më pas, në vitin 2023, Tasholli u bë pjesë e Aleancës për Ardhmërinë e Kosovës (AAK), parti e cila e propozoi si kandidat për të garuar për kryetar të Komunës së Lipjanit. Megjithatë, ende pa përfunduar procesi zgjedhor, ai dha dorëheqjen nga AAK-ja për të aderuar përfundimisht në radhët e partisë në pushtet, Lëvizjes Vetëvendosje.