Hapet kapitulli i ri ekonomik: Nis zbatimi i Marrëveshjes së Tregtisë së Lirë mes Kosovës dhe vendeve të EFTA-s

Në këtë të martë të 29 shtatorit, ka hyrë zyrtarisht në fuqi Marrëveshja e Tregtisë së Lirë ndërmjet Republikës së Kosovës dhe katër shteteve anëtare të Shoqatës Evropiane për Tregti të Lirë (EFTA), e cila përfshin Zvicrën, Norvegjinë, Islandën dhe Lihtenshtajnin. Ky zhvillim i rëndësishëm u bë i ditur në kuadër të një sesioni informues të organizuar nga Ministria e Industrisë, Tregtisë dhe Ndërmarrësisë. Gjatë këtij organizimi, Mimoza Kusari Lila, në cilësinë e udhëheqëses së këtij dikasteri qeveritar, theksoi se kjo ujdi do të shtojë ndjeshëm peshën e partneritetit të vendit tonë me shtetet e EFTA-s. Duke folur për avantazhet e këtij partneriteti, Kusari-Lila u shpreh se marrëveshja e re e pozicionon Kosovën në një nivel krejtësisht tjetër konkurrues. "Nga kjo sjellim një partneritet të fuqishëm ekonomik të Republikës sonë me këto shtete dhe padyshim me zbatimin e kësaj marrëveshje, ky partneritet fuqizohet edhe më tej dhe me efektet edhe në marrëdhëniet tona diplomatike... Besoj që ky është një fillim i mbarë jo vetëm për Republikën në përgjithësi, por edhe për të gjitha bizneset në veçanti të cilat shohin dhe kërkojnë zgjerimin e tregjeve, për arsye se me hyrjen në fuqi të kësaj marrëveshje, lehtësirat fakt janë tashmë të qasshme për të gjithë dhe Marrëveshja e Tregtisë së Lirë për produktet dhe shërbimet e vendos Kosovën në një pozicion të ri dhe shumë të rëndësishëm konkurrues në raport edhe me vendet e rajonit", u shpreh ajo. Nga ana e tij, Zef Dedaj, ushtrues detyre i drejtorit të Departamentit të Tregtisë, vuri në dukje se Kosova ka pasur një bilanc tregtar të vazhdueshëm me këto shtete ndër vite. Duke u ndalur te pengesat e dikurshme, Dedaj shtoi se marrëveshja eliminon barrierat ekzistuese në qarkullimin e mallrave dhe shërbimeve. "Për vitet me radhë, Kosova ka pasur një bilanc tregtar me të gjitha shtetet e EFTA-s. Edhe si tërësi, edhe si partnerë, edhe individualisht ka pasur shqetësime për një pjesë të mallrave, ashtu edhe në shërbime. Por një pjesë është edhe importi. Ai rritet vazhdimisht. Kjo ka ndikuar te rritja e teknologjisë, shpërndarja e njohurive, si dhe shumë produkte dhe servise të diferencuara e kështu me radhë. Pra me fjalë të tjera, rrjedh e mirë si për sa i përket shërbimeve, mallrave dhe shërbimeve bilaterale të tregtisë për Kosovën, por jo edhe për pjesën që kjo do të rritet më shumë dhe vazhdimisht do të rritet. Ndërsa kjo është një çështje teknike sa i përket shërbimeve", theksoi Dedaj. Ndërkohë, ambasadorja e Zvicrës në Kosovë, Anne-Lise Cattin Hennin, e vlerësoi lart këtë ngjarje, duke e lidhur atë edhe me nisjen e misionit të saj diplomatik në vend. Cattin Hennin e quajti këtë zhvillim si mundësinë më ideale për të nisur detyrën e re në Prishtinë. "Si dikush që sapo ka arritur së fundmi në Kosovë, vështirë se do të mund të kërkoja një rast më të mirë për një nga ngjarjet e mia të para. Kështu që, jam shumë e lumtur që jam këtu, është një kënaqësi e vërtetë. Dhe ne po shënojmë këtë arritje të rëndësishme në marrëdhëniet ekonomike midis Kosovës dhe vendeve të EFTA-s", deklaroi diplomatja zvicerane. Në këtë ngjarje ishte i pranishëm edhe drejtori i përgjithshëm i Doganës së Kosovës, Agron Llugaliu, i cili u ndal te përfitimet e prekshme që sjell kjo marrëveshje, duke e krahasuar atë me ecurinë e shkëmbimeve tregtare me Mbretërinë e Bashkuar. Llugaliu përdori shifrat e importit për të dëshmuar rritjen e shpejtë të këmbimeve tregtare. "Për shembull, po t'i referohemi të dhënave të tregtisë me Mbretërinë e Bashkuar, të njëjtat shfaqen në rritje të vazhdueshme. Në vitin e kaluar ne kemi pasur import në vlerë prej 26 milionë euro, ndërsa tani vetëm në tetë muajt e kaluar kemi 22.3 milionë euro. Pra, rreth tre fish rritje, më shumë se sa do të mbulojë kjo marrëveshje e tregtisë së lirë", përfundoi ai.