Hetimet e Prokurorisë Speciale: Drejtuesit e Listës Serbe nën lupë për cenim të rendit kushtetues

Nënkryetari i Listës Serbe, Igor Simiq, ka bërë të ditur se ai dhe disa funksionarë të tjerë të kësaj force politike kanë pranuar ftesa zyrtare për t'u paraqitur si të dyshuar pranë Departamentit për Hetimin e Terrorizmit në kuadër të Prokurorisë Speciale. Nëpërmjet një njoftimi të shpërndarë në rrjetet sociale, ai ka bërë me dije se atyre u ngarkohen katër vepra të rënda penale, duke përfshirë bashkimin për veprimtari kundër rendit kushtetues të Kosovës, sulmin ndaj personit zyrtar, rrezikimin e personave nën mbrojtje ndërkombëtare, si dhe përfshirjen në turma që kryejnë vepra penale dhe huliganizëm. "Si çdo herë tjetër, unë do t'i përgjigjem kësaj thirrjeje sepse nuk kam asgjë për të fshhur, i vetëdijshëm, njësoj si ata që e kanë formuluar këtë dokument, se nuk kam shkelur ligjin dhe se, në cilësinë e përfaqësuesit politik, kam për detyrë të jem pranë popullit tim dhe të flas hapur për sfidat e tij", ka deklaruar Simiq. Lidhur me këtë çështje, është dërguar një kërkesë zyrtare për informacione drejtuar Prokurorisë Speciale të Kosovës, për të kuptuar detajet konkrete të akuzave, ngjarjet përkatëse dhe numrin e saktë të personave që ndodhen nën hetim, mirëpo ky institucion ende nuk ka kthyer ndonjë përgjigje zyrtare. Simiq, i cili ushtron edhe detyrën e deputetit në Kuvendin e Kosovës, e ka cilësuar këtë zhvillim si një formë “presioni”, duke aluduar se ftesa të tilla nga organet e drejtësisë vijnë rregullisht sa herë që zyrtarët e kësaj partie ngrenë zërin për mbrojtjen e të drejtave të komunitetit serb. Lista Serbe përfaqëson subjektin më të madh politik të serbëve në Kosovë dhe gëzon mbështetjen e hapur të autoriteteve të Beogradit, ndërkohë që zyrtarët e saj edhe në të kaluarën janë thirrur për intervistim nga Prokuroria Speciale mbi dyshime të ngjashme për sulm ndaj rendit kushtetues. Gjatë viteve të kaluara, banorët serbë në pjesën veriore të vendit kanë ngritur barrikada dhe kanë organizuar protesta të ndryshme për të kundërshtuar zbatimin e vendimeve të Qeverisë së Kosovës, veprime të cilat janë mbështetur vazhdimisht nga Lista Serbe. Në qershor të këtij viti, Prokuroria e Kosovës ka zyrtarizuar aktakuzën ndaj gjashtë personave lidhur me vendosjen e barrikadave gjatë muajit dhjetor të vitit 2022. Këto bllokada rrugore u ngritën në periudhën kur po zhvilloheshin zgjedhjet lokale në komunat veriore me shumicë serbe, pas dorëheqjes së kryetarëve të atëhershëm si pjesë e largimit të koordinuar të serbëve nga institucionet e vendit, me iniciativë të vetë Listës Serbe. Kjo situatë u pasua nga tensione të larta që përfunduan në shpërthime dhune në fund të muajit maj 2023 në Zveçan, ku protestuesit serbë kundërshtuan hyrjen e kryetarit shqiptar në ndërtesën e komunës, i cili kishte dalë fitues në zgjedhjet e bojkotuara nga popullata lokale. Gjatë atyre trazirave, ku mbetën të lënduar mbi 90 pjesëtarë të trupave paqeruajtëse të KFOR-it, në terren ishin të pranishëm edhe përfaqësues të lartë të Listës Serbe. Der më tani, organet e drejtësisë kanë trajtuar rreth dhjetë persona për këto incidente, ku shumica janë liruar për t'u mbrojtur në liri me kusht, kurse disa shtetas të Serbisë janë dëbuar nga vendi. Kriza arriti pikën më kritike me sulmin e armatosur të një grupi serbësh në Banjskë të Zveçanit, aksion i cili u drejtua nga atëherë nënkryetari i Listës Serbe, Milan Radoiçiq. Si pasojë e këtij sulmi terrorist u vra rreshteri i Policisë së Kosovës, Afrim Bunjaku, ndërsa mbetën të vrarë edhe tre sulmues nga radhët e grupit. Për këtë ngjarje të rëndë, institucionet e Kosovës kanë adresuar akuza të drejtpërdrejta ndaj shtetit të Serbisë, pretendime të cilat janë hedhur poshtë nga zyrtarët në Beograd.