Rregullim në sektorin e ndërtimit: Ministria themelon komision mbikëqyrës për Odën e Arkitektëve dhe atë të Inxhinierëve

Ministria e Mjedisit dhe Planifikimit Hapësinor ka ndërmarrë një hap konkret drejt disiplinimit të sektorit të ndërtimit, duke themeluar Komisionin e ri Mbikëqyrës për Odën e Arkitektëve dhe Odën e Inxhinierëve të Kosovës. Lajmin e ka bërë të ditur ministrja Fitore Pacolli përmes një komunikimi publik, ku ka theksuar se ky mekanizëm është krijuar si përgjigje ndaj incidenteve të shpeshta që po ndodhin në kantiere dhe vendpunishte të ndryshme në vend. Qëllimi kryesor është vendosja e një standardi të lartë të llogaridhënies dhe përgjegjësisë ligjore. Sipas ministres Pacolli, ky veprim synon rritjen e bashkëpunimit mes ministrisë dhe odave profesionale. Ajo u shpreh se institucioni që drejton po angazhohet maksimalisht për të instaluar rend dhe disiplinë në profesionet e arkitekturës dhe inxhinierisë së ndërtimit, duke forcuar rolin mbikëqyrës të këtyre institucioneve. “Mbështetja financiare për këto dy oda, e cila ka vazhduar gjatë vitit 2026 dhe është parashikuar edhe për vitin 2027, vjen me kushte të qarta për transparencë dhe rezultate të prekshme. Komisioni i ri do të sigurojë një mbikëqyrje më rigoroze dhe reagim institucional të shpejtë sa herë që situata e kërkon. Synimi ynë i përbashkët është ngritja e standardeve dhe garantimi i integritetit profesional”, deklaroi ministrja Pacolli. Në fund, ministrja u ka bërë thirrje qytetarëve dhe profesionistëve të fushës që të jenë bashkëpunues me odat përkatëse, duke raportuar çdo rast kur projektet ndërtimore nuk përputhen me normat profesionale ose ligjet në fuqi.