Turneu ballkanik i Ursula von der Leyen: Të enjten vizita në Kosovë, Brukseli harton udhërrëfyesin për Tiranën dhe Podgoricën

Presidentja e Komisionit Evropian, Ursula von der Leyen, do të zbarkojë të enjten, më 1 tetor, në Prishtinë, ku do të zhvillojë takime zyrtare me ushtruesen e detyrës së presidentes, Albulena Haxhiu, dhe kryeministrin Albin Kurti, sipas konfirmimit zyrtar nga kabineti i saj. Kjo vizitë bën pjesë në një turne më të gjerë rajonal. Kryetarja e ekzekutivit evropian e nis rrugëtimin e saj në Ballkanin Perëndimor të mërkurën me një ndalesë në Tiranë, ndërsa pas Kosovës do të udhëtojë drejt Podgoricës po ashtu të enjten, për ta përmbyllur itinerarin të premten në Shkup. Siç on bërë të ditur nga Komisioni Evropian, në qendër të bisedimeve do të jenë perspektiva evropiane, procesi i integrimit gradual dhe Plani i Rritjes për vendet e rajonit. Zyrtarja e lartë e BE-së ndërmerr këtë tur në një kohë kur Komisioni po harton udhërrëfyes të veçantë për shtetet kandidate që shënojnë progresin më të madh. Këtë nismë ajo e kishte paralajmëruar në fjalimin e saj të 16 shtatorit, pa përmendur emra konkretë. Megjithatë, sipas të dhënave të deritanishme, këto dokumente orientuese pritet t'i dedikohen Shqipërisë dhe Malit të Zi në rajonin tonë, krahas Ukrainës dhe Moldavisë në Evropën Lindore, me qëllim caktimin e reformave, kushteve dhe afateve përcaktuese për procesin e negociatave, megjithëse propozimet zyrtare ende nuk janë dorëzuar. Gjatë qëndrimit në Podgoricë, von der Leyen do të bashkëbisedojë me presidentin Jakov Milatoviq dhe kryeministrin Milojko Spajiq. Mali i Zi mbetet shteti më i avancuar në këtë proces, pasi ka hapur të 33 kapitujt e bisedimeve dhe ka mbyllur përkohësisht 18 prej tyre, bazuar në të dhënat e fundit të Komisionit. Gjithashtu, Brukseli ka nisur përgatitjet për traktatin e anëtarësimit dhe ka prezantuar një paketë financiare për mbështetjen e mundshme të këtij shteti drejt fazës përfundimtare. Në këtë agjendë nuk janë përfshirë Serbia dhe Bosnja e Hercegovina. Komisioni ka sqaruar se kreu i KE-së planifikon t'i vizitojë këto dy vende në një periudhë të mëvonshme, për shkak të proceseve zgjedhore që pritet të mbahen atje.