Argjentina në këmbë: Papa Leo mbledh mbi 650 mijë besimtarë në Kordoba

Papa Leo ka vazhduar turneun e tij 12-ditor në Amerikën e Jugut me një sukses të jashtëzakonshëm, duke mbledhur rreth 650,000 besimtarë në një Meshë madhështore të mbajtur në natyrë, në Kordoba, qyteti i dytë më i madh i Argjentinës. Kjo pjesëmarrje masive shënon një tjetër moment historik të vizitës së tij, teksa mijëra pelegrinë nga çdo cep i vendit udhëtuan për të qenë pjesë e kësaj ngjarjeje shpirtërore. Atmosfera në aeroportin ushtarak, ku u zhvillua ceremonia, ishte elektrizuese. Besimtarët kishin mbushur hapësirat përgjatë barrierave, duke krijuar një valë ngjyrash me flamujt e Vatikanit. Me brohoritjet entuziaste “Të duam, Papa Leo”, turma e priti Atin e Shenjtë, i cili mbërriti në vendngjarje me papamobilin e tij të hapur. Gjatë predikimit të tij, Papa Leo përkujtoi me nderim traditën e thellë katolike të Argjentinës. Ai vuri theksin te shembulli i shenjtores së parë të vendit, murgeshës së shekullit të 18-të, Mama Antula, si dhe nderoi kujtimin e peshkopit, dy priftërinjve dhe laikun, të cilët humbën jetën gjatë diktaturës ushtarake të vitit 1976. “Këtu në Kordoba, ne i shprehim mirënjohjen tonë Zotit për frytet e pasura të shenjtërisë, të cilat janë mbjellë nga burrat dhe gratë që Ai i dërgoi në këtë tokë argjentinase”, deklaroi Papa Leo, duke përcjellë mesazhin e tij të paqes dhe bashkimit para një turme të pafundme besimtarësh.