Sulmi ndaj KFOR-it në Zveçan: Prokuroria Speciale ngre aktakuzë ndaj një personi

Prokuroria Speciale e Republikës së Kosovës ka zyrtarizuar ngritjen e një aktakuze në Gjykatën Themelore në Prishtinë kundër shtetasit me inicialet A.S. I njëjti akuzohet për veprat penale “Sulmi ndaj personit zyrtar” dhe “Pjesëmarrja në turmë që kryen vepër penale dhe huliganizmi”. Sipas dosjes së prokurorisë, ngjarja daton më 29 maj 2023, kur gjatë gjithë ditës, në afërsi të ndërtesës së Komunës së Zveçanit, i pandehuri në bashkëpunim me një grup personash të nacionalitetit serb nga Kosova dhe Serbia, ka marrë pjesë aktive në akte të dhunshme. I akuzuari dyshohet se ka përdorur mjete të forta, mjete shpërthyese të improvizuara dhe armë zjarri ndaj ushtarëve të misionit të KFOR-it. Si pasojë e këtij agresioni, përveç lëndimeve të pësuara nga pjesëtarë të Policisë së Kosovës, u regjistruan të lënduar të paktën 30 paqeruajtës të KFOR-it, tre prej të cilëve pësuan lëndime të rënda trupore. Gjatë kësaj përleshjeje, cak i sulmeve ishin edhe automjetet e ekipeve mediatike që po raportonin nga vendi i ngjarjes. Prokuroria ka theksuar se po vazhdon hetimet intensive për të zbardhur plotësisht përgjegjësit për sulmet e asaj dite. Në totalin e incidenteve të 29 majit 2023, numri i pjesëtarëve të KFOR-it që kërkuan ndihmë mjekësore arriti në 93, ndërsa lëndime u raportuan edhe në mesin e protestuesve. Tensionet kishin eskaluar për shkak të kundërshtimit të serbëve lokalë ndaj hyrjes së kryetarëve të rinj shqiptarë në objektet komunale në Zveçan, Leposaviq dhe Zubin Potok, pas zgjedhjeve të bojkotuara nga komuniteti serb. Autoritetet kosovare deri më tani kanë ndaluar dhjetëra të dyshuar lidhur me këto ngjarje, ndërsa disa prej tyre tashmë kanë pranuar fajësinë dhe janë dënuar. Institucionet e Kosovës kanë adresuar përgjegjësinë drejt Serbisë, duke pretenduar se pas dhunës qëndrojnë grupe kriminale të lidhura me presidentin serb, Aleksandar Vuçiq, ndërsa NATO-ja ka kërkuar vazhdimisht drejtësi dhe ndëshkim për autorët e këtyre sulmeve.