Lëvizje në radhët e Kombëtares: Hajdari lë grumbullimin për shkak dëmtimi, Avdullahu lirohet përkohësisht

Përfaqësuesja e Kosovës ka pësuar ndryshime në skuadër para ndeshjeve të ardhshme, pasi mbrojtësi Albian Hajdari është detyruar të largohet nga kampi stërvitor në Debrecen. Ky vendim është marrë pasi u konfirmua se ai nuk do të arrijë të rikuperohet në kohë për sfidat e radhës kundër Izraelit dhe Austrisë. Në komunikatën zyrtare të Federatës së Futbollit të Kosovës (FFK) theksohet se, pavarësisht përkushtimit të madh të departamentit mjekësor për ta kthyer në fushë, lojtari nuk do të mund të ndihmojë trajnerin Franco Foda në këto dy takime. Krahas kësaj mungese, shtabi teknik ka dhënë leje që mesfushori Leon Avdullahu të largohet përkohësisht nga grumbullimi, për shkak të disa çështjeve familjare. Nga Federata bëhet e ditur se mesfushori pritet t'i rikthehet grupit dhe t'i bashkohet skuadrës në kohën më të shpejtë të mundshme.