Dilemë për Arman Durmishin: Talenti i Juventusit refuzon Shqipërinë U19 dhe tundon Slloveninë

Përfaqësuesja e Shqipërisë U19 ka bërë publike listën e lojtarëve të grumbulluar për fazën e dytë të Kampionatit Europian në Ligën B, ku kuqezinjtë do të përballen me Qipron dhe Armeninë. Megjithatë, ajo që ra në sy menjëherë ishte mungesa e emrit të qendërsulmuesit premtues, Arman Durmishi. Durmishi, i cili është pjesë e Juventus Next Gen në Serie C, po vëzhgohet me vëmendje edhe nga ekipi i parë i “Zonjës së Vjetër”, ku herë pas here është ftuar për të stërvitur me yjet e skuadrës nga trajneri Luciano Spalletti. Rritja e tij profesionale ka bërë që statusi i tij në përfaqësuese të ndryshojë. Sipas informacioneve të fundit, futbollisti ka shprehur rezervat e tij për të vazhduar rrugëtimin me Shqipërinë U19, duke synuar një përparim të menjëhershëm drejt Kombëtares A. Kjo pakënaqësi ka krijuar një situatë të paqartë për të ardhmen e tij ndërkombëtare. Në këtë mes, situata komplikohet edhe nga interesimi i Sllovenisë. Duke qenë se Durmishi ka përfaqësuar më herët Slloveninë në grupmoshat U15, U16 dhe U17, Federata Sllovene i ka dërguar ftesë zyrtare për t'iu bashkuar përfaqësueses U21. Aktualisht, talenti shqiptar mbetet në pritje dhe ende nuk ka marrë një vendim përfundimtar mbi fanellën që do të përfaqësojë në të ardhmen.