Mbështetje e palëkundur: “Dardanët” udhëtojnë drejt Hungarisë përkrah Kombëtares

Tifogrupi zyrtar i Përfaqësueses së Kosovës, “Dardanët”, ka zyrtarizuar praninë e tyre në stadiumin në Hungari, ku do të ofrojnë mbështetjen e tyre maksimale për futbollistët tanë në sfidën e radhës kundër Izraelit. Përmes një njoftimi zyrtar në rrjetet sociale, anëtarët e këtij tifogrupi kanë theksuar se përkushtimi ndaj fanellës kombëtare mbetet i pandryshuar, pavarësisht sfidave gjeografike, statusit të ndeshjes si vendas apo mysafir, apo faktit se takimi do të zhvillohet në terren neutral. “Nuk ka rëndësi a luajmë në fushë vendëse, si mysafirë apo në fushë neutrale. Dardanët në çdo variant e në çdo cep të Evropës i qëndrojnë pranë ekipit kombëtar të vet me krenari dhe besnikëri”, kanë deklaruar ndër të tjera “Dardanët”. Grupi i tifozëve ka bërë të qartë se rezultatet e kaluara apo sfidat në fushë nuk do të zbehin kurrë entuziazmin e tyre, duke u bërë thirrje gjithë dashamirësve të futbollit që të bëhen bashkë për t'i dhënë zemër Kosovës në këtë duel të rëndësishëm. Kujtojmë se ndeshja e radhës e Kombëtares së Kosovës kundër Izraelit është planifikuar të zhvillohet këtë të enjte, me fillim nga ora 20:45.