Skandal në Hungari: Arrestohet ish-ministri i Kulturës, Balazs Hanko, pas heqjes së imunitetit

Një ish-anëtar i kabinetit qeverisës të ish-kryeministrit Viktor Orban është vënë në pranga këtë të martë, nën dyshimet për keqpërdorim të fondeve në kuadër të Fondit Kombëtar Kulturor (NKA), institucion ky që i nënshtrohet mbikëqyrjes së ministrisë së resë. Bëhet fjalë për Balazs Hanko, ish-ministër i Kulturës dhe aktualisht deputet në parlament, i cili është ndaluar gjatë orëve të vona të së hënës nga Administrata Kombëtare e Taksave dhe Doganave. Ky veprim pasoi vendimin e ligjvënësve hungarezë për t'i hequr atij imunitetin parlamentar. Nga ana e tij, Hanko ka hedhur poshtë çdo akuzë për shkelje ligjore. Kujtojmë se gjatë muajit korrik, forcat policore kishin ndërmarrë një aksion kontrolli në zyrat e serverave të internetit të forcës kryesore opozitare në Hungari, Fidesz, si pjesë e hetimeve për “keqpërdorim dhe vepra të tjera penale” lidhur me NKA-në. Autoritetet e prokurorisë ndërmorën hapat për nisjen e procedimeve penale, pasi pranuan kallëzime nga disa persona se NKA kishte shpërndarë miliarda forinta përmes granteve shtetërore për organizata dhe artistë afër partisë Fidesz, duke përdorur një procedurë jo-transparente. Të gjithë personat e përfshirë kanë mohuar çdo paligjshmëri. Nëpërmjet një njoftimi zyrtar të publikuar të martën, prokuroria theksoi: “Si rezultat i një hetimi të vazhdueshëm… për veprën penale të përvetësimit të paligjshëm… zyra e prokurorit mori në paraburgim deputetin e Parlamentit Balazs Hanko dhe e mori në pyetje si të dyshuar”. Në një video të transmetuar drejtpërdrejt në faqen zyrtare në Facebook të Orbanit pak para se të ndalohej, Hanko u shpreh: “Ndërgjegjja ime është e pastër, ky është një gjyq spektakël politik”. Ndërkohë, institucioni hungarez kundër korrupsionit, i ngritur nga kryeministri Peter Magyar në kuadër të nismave të tij kundër këtij fenomeni, ka bërë të ditur katër dosjet e para mbi të cilat do të fokusohet. Si pjesë e së njëjtës valë hetimesh për ryshfet të dyshuar, gjatë së hënës është arrestuar edhe Miklos Sesztak, i cili ka mbajtur postin e ministrit për Zhvillimin Kombëtar gjatë periudhës 2014-2018 në kabinetin e Orbanit. Edhe Sesztak i ka mohuar akuzat ndaj tij.