Lajme nga kampi i “Dardanëve”: Betim Fazliji i bashkohet grupit, konfirmohet mungesa e Lumbardh Dellovës

Kombëtarja e Kosovës ka zhvilluar sot seancën e dytë stërvitore, duke intensifikuar përgatitjet për sfidat e ardhshme në Ligën e Kombeve kundër Izraelit dhe Irlandës. Në këtë seancë, grupit i është bashkuar futbollisti Betim Fazliji, i cili tashmë ka nisur punën me pjesën tjetër të ekipit. Ndërkohë, stafi teknik ka marrë një lajm jo të mirë sa i përket qendërmbrojtësit Lumbardh Dellova. Pas ekzaminimeve mjekësore, është konstatuar se lojtari nuk është në gjendje të rikuperohet për këto dy ndeshje, ndaj është vendosur lirimi i tij nga grumbullimi, pavarësisht vullnetit të madh të futbollistit për të qenë pjesë e ekipit. Këto dy takime janë tejet domethënëse për Kosovën, e cila synon sigurimin e pozitës së dytë në grup. Një sukses i tillë do të ishte vendimtar për të pasur një pozicion më të favorshëm në shortin e kualifikimeve për Kampionatin Evropian 2028. Kalendari i ndeshjeve nis të shtunën, kur “Dardanët” do të presin në stadiumin “Fadil Vokrri” përfaqësuesen e Izraelit, me fillim nga ora 15:00. Pas kësaj sfide, ekipi do të udhëtojë drejt Dublinit për t'u përballur me Irlandën, ndeshje kjo që do të luhet tri ditë pas duelit të parë.