Rrëfimi rrëqethës i dëshmitares për shpërthimin në Ibër-Lepenc: Shtëpia u drodh, pandeha se ishte tërmet

Milena Pashpereviq, e cila mbakët statusin e palës së dëmtuar në procesin gjyqësor për sulmin ndaj infrastrukturës së Ibër-Lepencit, ka dëshmuar lidhur me dëmet e rënda materiale që iu shkaktuan banesës së saj gjatë shpërthimit të ndodhur më 29 nëntor 2024 në fshatin Varagë të Zubin Potokut. E pyetur nga përfaqësuesit e akuzuesit shtetëror, Pashpereviq ka kujtuar se gjatë çastit kritik ka qenë e vetme në ambientet e shtëpisë, ndërsa nga intensiteti i tronditjes fillimisht kishte besuar se bëhej fjalë për lëkundje sizmike. Ajo ka vënë në dukje se pasojat në pronën e saj kanë qenë mjaft të ndjeshme. “Në shtëpinë time, kam qenë e shtrirë. Nuk ka qenë askush në shtëpi, bashkëshorti im ka qenë në udhëtim. Më kujtohet se ka qenë detonim shumë i madh, mendoj se ka qenë koha e errësuar, sepse kur kanë ardhur veturat ka qenë errësirë. Kur kam dalë dhe kam parë që një sasi e madhe e ujit vjen drejt shtëpisë sime, veturat janë ndaluar. Shtëpia ime ndodhet përfundi rrugës magjistrale, ndërsa ngjarja ka ndodhur mbi rrugën magjistrale”, tha ajo. Gjatë rrëfimit të saj, ajo ka evokuar gjithashtu çastet e frikshme pas detonimit, duke theksuar se forca e goditjes ka lëkundur vetë strukturën e ndërtesës dhe ka shkaktuar dëmtime fizike në të. “Detonimi ka qenë i madh, është shkundur shtëpia, themeli i shtëpisë ka lëvizur, si dhe qynga e shporetit ka dalë nga vendi, si dhe në ato momente kam menduar mos është ndonjë tërmet. Fillimisht kam shikuar në dritare, pasi kam dëgjuar eksplodimin, e kam parë atë ujë, shumë sasi e madhe e ujit, e kam thirrur nënën në telefon. Kam kërkuar ndihmë që të vijë dhe të shohim se çfarë po ndodh. I kam thirrur prindërit që të vijnë, pasi ndodhen aty në fshat”, deklaroi ajo. Pashpereviq nuk ka fshehur gjendjen e rënduar emocionale në ato çaste, duke shtuar se mungesa e fqinjëve afër shtëpisë e kishte shtuar ndjenjën e ankthit dhe frikës. “Po, shumë e shqetësuar dhe e frikësuar, se kam qenë vetëm në shtëpi, pasi nuk kam fqinjë në shtëpinë time. Jo vetëm veturat i kam parë”, tha ajo. Lidhur me kompensimin e dëmeve, dëshmitarja ka bërë të ditur se kreu i Komunës së Zubin Potokut, Izmir Zeqiri, i kishte ofruar një mbështetje financiare prej 1 mijë e 300 eurosh, megjithëse ka nënvizuar se kjo ndihmë nuk i ka mbuluar plotësisht dëmet e pësuara. “Dëmtimi ka qenë shumë i madh (i shtëpisë). Kryetari i komunës, Izmir Zeqiri, na ka ndihmuar me të holla, 1 mijë e 300 euro. Nuk është që na është kompensuar dëmi, por në ato momente na ka ndihmuar me ato të holla”, tha ajo. E pyetur nga prokurori se a ka ndonjë kërkesë pasurore apo dëmshpërblim ndaj të pandehurve të kësaj çështjeje, ajo është përgjigjur shkurtimisht me një “Jo”. Kujtojmë se Prokuroria Speciale, pas një hetimi të gjerë të zhvilluar në bashkëpunim të ngushtë me Policinë e Kosovës, përkatësisht Drejtorinë Kundër Terrorizmit, si dhe me partnerët ndërkombëtarë evropianë, ka zyrtarizuar aktakuzën ndaj Jovan Viqentijeviqit, Dragisha Viqentijeviqit dhe Igor Dimoviqit. Ata ngarkohen me një sërë veprash të rënda penale, përfshirë rrezikimin e rendit kushtetues përmes shkatërrimit apo dëmtimit të instalimeve publike, kryerjen e veprës terroriste, armëmbajtjen pa leje dhe spiunazhin. Sipas dosjes hetimore të Prokurorisë, më 29 nëntor 2024, në fshatin Varagë të Zubin Potokut, në zonën e kanalit të Ibër-Lepencit, të pandehurit Jovan dhe Dragisha Viqentijeviq, në bashkëveprim me persona të tjerë të panjohur dhe pas një planifikimi paraprak, kishin vendosur rreth 20 kilogramë eksploziv të llojit TNT në brendësi të kanalit. Ata dyshohet se e kanë aktivizuar lëndën plasëse përmes një çante të lidhur me litar në një shtyllë betoni. Si pasojë e këtij akti shkatërrues, u dëmtua rëndë integriteti strukturor i kanalit, u ndërpre furnizimi me ujë të pijshëm për banorët dhe u rrezikua drejtpërdrejt prodhimi i energjisë elektrike.