Në Qendrën Klinike Universitare (QKUK) është evidentuar mungesë e një numri ilaçesh esenciale e bazike. Prindër të fëmijëve të hospitalizuar në Klinikën e Pediatrisë kanë treguar të mërkurën për mungesën e tretësirave të ndryshme fiziologjike e edhe të antibiotikëve. Në kushtin e anonimitetit, ata kanë treguar se me këtë situatë janë përballur prej kur fëmijët janë pranuar në Klinikë. “Glukozën e kemi blerë patjetër, për çdo ditë, nga dy copa – Glukozën, Ceftriaxone që është antibiotikë”, ka thënë një nga ta. “Ilaçe, infuziona”, ka treguar një prind tjetër, për ilaçet që i është dashur t’i blejë për fëmijën e hospitalizuar. Situatë e ngjashme me mungesë të ilaçeve është edhe në klinika të tjera. Pacientë që janë trajtuar në Klinikën e Kirurgjisë, kanë treguar për mungesa të disa produkteve. Në këtë recetë për barna, një pacienti të mërkurën i janë shkruar katër produkte për t’i blerë në barnatore private, në mesin e tyre janë tretësira Ringer, vitamina B-comlex, një antibiotik e një albuminë. “Infuzionet krejt i kemi ble. Po thonë: ‘nuk ka’. Kemi shku dhe i kena ble”, ka thënë familjarja e një pacienti. “Një antibiotik e kam ble”, ka treguar familjari i një pacienti tjetër. E, një nga familjarët e pacientëve ka treguar shumën e shpenzuar për barna gjatë ditës.“64 euro”, ka thënë ai. Në QKUK dhe ShSKUK gjatë ditës nuk janë përgjigjur në pyetjet për arsyen e mungesës së glukozës, albuminave e antibiotikëve. Për mungesën e glukozës, KOHA pati raportuar edhe në fillim të vitit. Në SHSKUK në muajin mars bënë të ditur se kanë nënshkruar kontratë për furnizim me këtë produkt të 100 dhe 500 mililitrave. E pavarësisht kësaj, siç ka mësuar KOHA, pacientët prej muajsh është dashur ta blejnë këtë medikament. Për mungesë të ilaçeve kanë treguar edhe pacientët në Klinikën e Onkologjisë. Një ta tha se javën e kaluar kur e kishte terminin për ta marrë një ilaç për kocka, por ka munguar dhe është detyruar ta blejë. “Zometan e marr çdo katër javë. Ka mungesë. Zometan, për shembull, unë e kam ble 25 euro”, ka thënë ai. Për sigurimin e medikamentit “Zometa”, ShSKUK-ja më 7 prill ka nënshkruar kontratë për furnizim. Në këtë institucion nuk e kanë treguar arsyen e mungesës ndonëse ka operator të kontraktuar.