Hoti: Shpenzimet e jetesës janë ngritur për 45% në pesë vitet e fundit

Deputeti i Lidhjes Demokratike të Kosovës, Avdullah Hoti, ka ngritur shqetësimin për situatën e rëndë ekonomike në vend, duke theksuar se vala e shtrenjtimit po rëndon ndjeshëm buxhetin e familjeve kosovare. Nëpërmjet një postimi në rrjetet sociale, ai bëri të ditur se referuar statistikave zyrtare të Agjencisë së Statistikave të Kosovës, shpenzimet e përgjithshme për jetesë kanë regjistruar një rritje mesatare prej 45 për qind gjatë pesë viteve të fundit, ndërkohë që mallrat e shportës së përditshme kanë shënuar pothuajse dyfishim të çmimeve. Duke drejtuar kritika të ashpra ndaj Qeverisë Kurti, ligjvënësi i LDK-së e ka cilësuar narrativën zyrtare për progres ekonomik si një formë propaganda që nuk përkon me realitetin e përditshëm të qytetarëve. “Buxheti nuk matet me shifrat në letër, por me cilësinë e jetës së qytetarëve,” ka shkruar Hoti. Sipas tij, në pesë vitet e fundit, bazuar në të dhënat e ASK-së, kostoja e jetesës është rritur mesatarisht për 45%, ndërsa për shumë produkte të konsumit familjar çmimet gati janë dyfishuar. “Kur çmimet dyfishohen, jeta e qytetarëve bëhet më e vështirë. Propaganda për sukses ekonomik nuk e mbush shportën e konsumit të familjeve!” – ka vijuar reagimi i tij. Në këtë kontekst, Hoti ka shtuar se ekzekutivi mund të paraqesë shifra të larta miliardëshe, por gjendja reale dëshmohet tek shpenzimet e konsumit familjar dhe te faturat që qytetarët paguajnë çdo fundjavë në dyqane e markete. Ai ka vlerësuar se diskutimet në Kuvend lidhur me Kornizën Buxhetore për periudhën 2027-2029 duhet domosdoshmërisht të fokusohen në tri pika kyçe: analizimin e rritjes së kostos së jetesës për qytetarët, përcaktimin e përgjegjësisë institucionale dhe gjetjen e mekanizmave për lehtësimin e kësaj barre financiare.