Hoti alarmon për ekonominë: Shpenzimet e jetesës janë shtrenjtuar për 45% në pesë vitet e fundit

Deputeti i Lidhjes Demokratike të Kosovës, Avdullah Hoti, ka ngritur shqetësimin e tij për situatën e rëndë ekonomike në vend, duke theksuar se vala e shtrenjtimit po e rëndon çdo ditë e më shumë buxhetin e familjeve kosovare. Nëpërmjet një reagimi publik në rrjetet sociale, ligjvënësi i LDK-së iu referua statistikave zyrtare të Agjencisë së Statistikave të Kosovës (ASK), sipas të cilave shpenzimet e përgjithshme për jetesë kanë regjistruar një ngritje mesatare prej 45 për qind përgjatë pesë viteve të shkuara, ndërkohë që artikujt bazë të shportës familjare pothuajse i kanë dyfishuar çmimet e tyre. Duke hedhur poshtë narrativën zyrtare për gjoja të arritura në ekonomi, Hoti ka drejtuar kritika të ashpra në drejtim të Qeverisë Kurti për atë që e cilësoi si propagandë qeveritare. “Buxheti nuk matet me shifrat në letër, por me cilësinë e jetës së qytetarëve. Në pesë vitet e fundit, sipas ASK-së, kostoja e jetesës është rritur mesatarisht për 45%, ndërsa për shumë produkte të konsumit familjar çmimet gati janë dyfishuar. Kur çmimet dyfishohen, jeta e qytetarëve bëhet më e vështirë. Propaganda për sukses ekonomik nuk e mbush shportën e konsumit të familjeve! Qeveria mund të prezantojë shifra miliardëshe, por realiteti matet me koston e konsumit familjar, matet me koston që çdo vikend familja paguan në arkën e marketeve. Debati që duhet të bëhet në Kuvend me rastin e diskutimit të buxhetit 2027-2029 duhet të përqendrohet në këto çështje: - Çfarë ka ndodhur me koston e jetës së qytetarëve? - Kush mban përgjegjësi për këtë dhe - Çfarë mund të bëhet për të lehtësuar këtë barrë?”, ka shkruar Hoti në postimin e tij.